რუსეთის მზარდი აგრესიისა და ჯარების მობილიზების ფონზე, აშშ-ის სენატმა 17 თებერვალს უკრაინის მხარდამჭერი რეზოლუცია მიიღო და რუსეთის სამხედრო აგრესია დაგმო. ამის შესახებ ინფორმაციას AP News ავრცელებს და აღნიშნავს, რომ მას ხმათა სრული უმრავლესობით დაუჭირეს მხარი.

მედია წერს, რომ რეზოლუცია კანონის ძალას არ ატარებს, თუმცა უსაფრთხო, დამოუკიდებელი და დემოკრატული უკრაინის მიმართ აშშ-ის ურყევ მხარდაჭერას აფიქსირებს და უკრაინის საზღვართან კრემლის სამხედრო მობილიზებას აკრიტიკებს.

"უკრაინის დამოუკიდებლობისა და სუვერენიტეტის მხარდაჭერაში ეს კონგრესი ერთიანია", — განაცხადა სენატორმა რობ პორტმანმა.

სენატმა რეზოლუცია მას შემდეგ მიიღო, რაც ჯარების გაყვანის შესახებ კრემლის მტკიცების პარალელურად, აშშ-ის პრეზიდენტმა, ჯო ბაიდენმა შეჭრის საფრთხეზე კვლავ ისაუბრა. მან თქვა, რომ ყველა ნიშანი უახლოეს დღეებში რუსეთის პოტენციურ თავდასხმაზე მიუთითებს.

17 თებერვალს ოკუპანტებმა დონბასიდან ლუგანსკის ოლქის ერთ-ერთ დასახლებას ცეცხლი გაუხსნეს, ჭურვი კი საბავშვო ბაღს მოხვდა. ამას უკრაინის პრეზიდენტმა, ვოლოდიმირ ზელენსკიმ "დიდი პროვოკაცია" უწოდა და ხაზი გაუსვა უკრაინაში დიპლომატების დარჩენის აუცილებლობას.

რუსეთის მტკიცების პარალელურად, რომ უკრაინის საზღვრის სიახლოვიდან რუსული ჯარები გაჰყავთ, აშშ-ის პრეზიდენტის ადმინისტრაციის ოფიციალური წარმომადგენელი ამბობს, რომ ბოლო დღეებში უკრაინის საზღვართან რუსი სამხედროების რიცხვი 7 000-ით გაიზარდა. ზელენსკიც უარყოფს, რომ რუსეთის ჯარები გადიან. მისი თქმით, ამას რეალურად ვერ ხედავენ და მხოლოდ ესმით მის შესახებ.

ამერიკის შეერთებული შტატების სახელმწიფო მდივნის, ენტონი ბლინკენის განცხადებით, რუსულ სამხედრო ძალებს უკრაინის საზღვარი არ დაუტოვებიათ. მისი თქმით, რუსეთის ქმედებები და განცხადებები ერთმანეთისგან განსხვავდება.

პენტაგონის ინფორმაციით, ბოლო დღეების განმავლობაში, რუსეთის პრეზიდენტმა, ვლადიმერ პუტინმა უკრაინის საზღვართან და ბელარუსის ტერიტორიაზე დამატებითი სამხედრო ძალები განათავსა.

ევროპული საბჭოს პრეზიდენტის, შარლ მიშელის განცხადებით, რუსეთმა ომსა და დიპლომატიას შორის არჩევანი უნდა გააკეთოს. მისი თქმით, უკრაინის წინააღმდეგ რუსეთის უპრეცედენტო სამხედრო ესკალაცია ევროპაში მშვიდობასა და უსაფრთხოებას უქმნის საფრთხეს.