ლეიბორისტული პარტიის წევრებმა მოქალაქეები მეტროში დემონსტრაციულად უფასოდ გაატარეს. ამით მათ თბილისის მერის, კახა კალაძის ე.წ გამტარებლების შეღავათიანი ბარათების დაბლოკვასთან დაკავშირებით გაკეთებული განცხადება გააპროტესტეს.

"დღეს ათობით მოქალაქე გავატარეთ მეტროში უფასოდ, რითაც დემონსტრაციულად გამოვუცხადეთ დაუმორჩილებლობა კახა კალაძის მორიგ ფაშისტურ გადაწყვეტილებას, რომელიც გვიკრძალავს საკუთარი ბარათით სხვა ადამიანის გატარებას. სამომავლო გეგმებზე ჯერ დეტალურად ვერ გეტყვით, მაგრამ ვფიქრობთ მასშტაბების გაზრდაზე და ამ ყველაფრისთვის სისტემური ხასიათის მიცემაზე", — წერს ფეისბუქგვერდზე ლეიბორისტული პარტიის წევრი, მიხეილ ქუმსიშვილი.

ბარათების გაუქმებასთან დაკავშირებით კალაძემ დღეს განაცხადა. მისი თქმით, ეს კანონდარღვევაა და იმისთვის რომ "აღმოიფხვრას", ყველაფერს გააკეთებენ. თბილისის მერმა აღნიშნა, რომ ფაქტის დაფიქსირების შემთხვევაში სატრანსპორტო კომპანიის მონიტორინგის სამსახურის თანამშრომლებს, კონტროლიორებს მათი ჩამორთმევისა და დაბლოკვის უფლება აქვთ.