რამდენიმე დღის წინ ნორვეგიაში კანონის ძალით აიკრძალა ძაღლების ისეთი ცნობილი ჯიშების გამრავლება, როგორებიც ინგლისური ბულდოგები და კავალერ კინგ ჩარლზ სპანიელები არიან. მიზეზი ძაღლების ამ ჯიშებისთვის დამახასიათებელი ჯანმრთელობის თანდაყოლილი პრობლემებია.

გადაწყვეტილება ცხოველთა დაცვის ნორვეგიულმა საზოგადოებამ გაასაჯაროვა და მათ მიღებული კანონი იმით დაასაბუთეს, რომ ამ ჯიშების ხელოვნურად გამრავლება ნორვეგიის ცხოველთა კეთილდღეობის აქტს ეწინააღმდეგება.

ცხოველთა დაცვის ნორვეგიული საზოგადოების ხელმძღვანელის, აშილდ როალდსეტის განცხადებით, "ძაღლის ჯიშებში ადამიანის ჩარევის შედეგად გამოწვეული ჯანმრთელობის პრობლემების შესახებ ჯერ კიდევ ადრეული მე-20 საუკუნიდანაა ცნობილი. ამიტომ ახლახან მიღებული გადაწყვეტილება დაგვიანებულია კიდეც".

"ათწლეულების განმავლობაში სნეულ ძაღლებს უკანონოდ ამრავლებდნენ. ეს ჩვენი ოთხფეხა მეგობრების სისტემური და ორგანიზებული ღალატია. ახლა უკვე საბოლოოდ გადაწყდა, რომ მსგავსი ქმედება კანონის დარღვევაა", — ვკითხულობთ ორგანიზაციის მიერ გავრცელებულ განცხადებაში.

კავალერ კინგ ჩარლზ სპანიელი.

ფოტო: GETTY

ოფიციალურად დადასტურებულია, რომ ინგლისური ბულდოგისა და კავალერ კინგ ჩარლზ სპანიელის ჯიშის ძაღლებს მეტწილად ისეთი მძიმე ჯანმრთელობის პრობლემები აქვთ, როგორებიცაა სუნთქვის გაძნელება, მხედველობის გაუარესება, კანის ინფექციები და გულის პრობლემები.

2016 წელს კალიფორნიის უნივერსიტეტის მიერ ჩატარებული კვლევით დადგინდა, რომ ინგლისურ ბულდოგებს აკლიათ გამრავლებისთვის აუცილებელი გენეტიკური მრავალფეროვნება. თანამედროვე ტექნოლოგიების საშუალებით კონკრეტული ჯიშის ძაღლის გამრავლება გამარტივდა, თუმცა დიდი რისკის ფასად: 102 ჯანმრთელი ძაღლიდან თითქმის 80 გენეტიკურად საგანგაშოდ იდენტურია, რაც ამ ჯიშში ჯანმრთელობის სერიოზულ პრობლემებს წარმოქმნის.

ინგლისური ბულდოგი

ფოტო: Getty

მხოლოდ ცოტა ბულდოგს შეუძლია ბუნებრივად გამრავლება, ამიტომ ძირითადად ხელოვნურ განაყოფიერებას მიმართავენ ხოლმე. ასევე ძალიან დიდი შანსია, რომ ამ ჯიშის ლეკვები სხეულის სხვადასხვა დეფექტით დაიბადონ, ან მოგვიანებით შეექმნათ მძიმე გართულებები.

კვლევის თანახმად, ყველაზე ჯანმრთელი ინგლისური ბულდოგის ლეკვების სიცოცხლის საშუალო ხანგრძლივობაც კი 8,5 წელია.