საკონკურსო კომისიებმა ინსპექტორის სამსახურის ბაზაზე შექმნილი ორი ახალი უწყების, პერსონალურ მონაცემთა დაცვის სამსახურისა და სპეციალური საგამოძიებო სამსახურის უფროსთა 3-3 კანდიდატურა შეარჩიეს. ისინი პრემიერმინისტრს, ირაკლი ღარიბაშვილს წარედგინება.

სპეციალური საგამოძიებო სამსახურის უფროსის თანამდებობაზე კანდიდატურებად ელენე ალავერდაშვილი, ემზარ გაგნიძე და კარლო კაციტაძე შეირჩნენ. რაც შეეხება პერსონალურ მონაცემთა დაცვის სამსახურს, უფროსის პოსტზე შერჩეული კანდიდატები კახა მაღრაძე, ლელა ჯანაშვილი და თამარ ალფაიძე არიან. თითოეული სამსახურის კანდიდატებს შორის 2 ღარიბაშვილმა ასარჩევად საქართველოს პარლამენტს უნდა წარუდგინოს.

"კანდიდატები საკონკურსო კომისიამ კენჭისყრის შედეგად, თითოეულთან ინდივიდუალური გასაუბრების შედეგად შეარჩია. კომისიის წევრებმა იმ კონკურსანტებს მოუსმინეს, რომლებმაც საკვალიფიკაციო მოთხოვნები დააკმაყოფილეს და კონკურსში მონაწილეობისთვის საჭირო დოკუმენტაცია სრულყოფილად, შესაბამისი ვადების დაცვით წარადგინეს. ინდივიდუალური გასაუბრებები ჯამში 15-მდე კანდიდატთან ჩატარდა", — ნათქვამია მთავრობის ინფორმაციაში.

საკონკურსო კომისიების თავმჯდომარე მთავრობის ადმინისტრაციის უფროსი, ილია დარჩიაშვილია. კომისიის შემადგენლობაში არიან:

• საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე — მიხეილ სარჯველაძე;

• საქართველოს პარლამენტის იურიდიულ საკითხთა კომიტეტის თავმჯდომარე — ანრი ოხანაშვილი;

• საქართველოს უზენაესი სასამართლოს თავმჯდომარის მოადგილე — გიორგი მიქაუტაძე;

• საქართველოს გენერალური პროკურორის პირველი მოადგილე — ბაკურ აბულაძე;

• საქართველოს სახალხო დამცველის მოადგილე — გიორგი ბურჯანაძე.

პარლამენტმა ქართული ოცნების ინიცირებული კანონპროექტი სახელმწიფო ინსპექტორის სამსახურის გაუქმების შესახებ დაჩქარებულად განიხილა და გასული წლის 30 დეკემბერს დაამტკიცა. კანონპროექტის მიხედვით, უქმდება სახელმწიფო ინსპექტორის თანამდებობა და სამსახური. მის მაგივრად იქმნება ორი — სპეციალური საგამოძიებო და პერსონალურ მონაცემთა დაცვის სამსახურები.

კანონის მიღების შეჩერება მოითხოვა ევროკავშირმა, ევროპის საბჭოს ადამიანის უფლებათა კომისარმა, გაერომ, საქართველოში აკრედიტებული დიპლომატიური კორპუსის წარმომადგენლებმა, ევროპარლამენტარებმა, ამერიკის ელჩმა. ყველა მათგანმა მიუთითა, რომ დამოუკიდებელი სახელმწიფო ინსტიტუტის დაშლა ასეთი დაჩქარებული წესით, გაუმჭვირვალედ, იყო მიუღებელი და ამ კანონის მიღება უნდა დაფუძნებოდა ფართო დისკუსიებს, ღია და ღრმა განხილვებს, მათ შორის, ამ დისკუსიებში პირველ რიგში ჩართული უნდა ყოფილიყო სახელმწიფო ინსპექტორის სამსახური, რეფორმა უნდა განხორციელებულიყო ფრთხილად და თანამდებობის პირების მიმართ მსგავსი მსუსხავი ეფექტის თავიდან არიდების გზით.

ლონდა თოლორაიას შეფასებით, ეს არის შტურმი სამსახურზე, რომელიც თავის გადაწყვეტილებებს არასოდეს არავის უთანხმებდა. მისი თქმით, მმართველ პარტიას სამსახურის გაუქმების შესახებ მათთან არანაირი კომუნიკაცია არ ჰქონია. მისივე თქმით, მაშინ, როდესაც სამშობიაროდან უწყების გაძლიერების პროექტს წერდა, პარლამენტი მისი გაუქმების შესახებ კანონპროექტს ამზადებდა.