ადამიანის შემოქმედებითობას საზღვრები არ აქვს და ამის დასტურია 100-ზე მეტი ვიბრატორისგან დამზადებული სკულპტურა, რომელიც მაიამელმა ხელოვანმა, დაფნი ბლეიდმა შექმნა.

დაფნიმ ვიბრატორების ჩრდილოამერიკელი იმპორტიორის გამოცხადებულ კონკურსში გაიმარჯვა. კონკურსი, სახელად "სასიამოვნო, როგორც ხელოვნება", დაზიანებული და ქარხნული წუნის მქონე 100 ვიბრატორისგან ორიგინალური ნიმუშის შექმნას ითვალისწინებდა.

თუმცა, როგორც კომპანია აღნიშნავს, ხელოვანების ასეთ აქტიურობასა და კონკურსის მასშტაბურობას არ მოელოდნენ. მისი დირექტორის, კენ ჰერსკოვიცის თქმით, შექმნილმა ნამუშევრებმა დაამტკიცეს, რომ ვიბრატორი მომხმარებლისთვის, უბრალოდ, ფიზიკური ნივთი არ არის. ზოგმა ის ცოცხალ არსებად, ზოგმაც — დნმ-ის სამგანზომილებიან მოდელად აქცია.

თავად ბლეიდმა კონკურსის შესახებ მის დასრულებამდე მხოლოდ ხუთი დღით ადრე შეიტყო, ამიტომ, კონცეფცია ნაჩქარევად მოიფიქრა და გაგზავნა.

ჰერსკოვიცი ამბობს, რომ ბლეიდის ნამუშევარმა უმთავრესად გამორჩეული ხედვის გამო მიიქცია ყურადღება. მიუხედავად იმისა, რომ ხელოვანს სკულპტურა ჯერ აგებული არ ჰქონდა, კონცეფციაში ესკიზებით, შთამაგონებელი სურათებით, მცირედი დეტალებითა და დაწვრილმანებული აღწერით ზუსტად ახსნა, რისი გადმოცემა სურდა.

ამიტომ, დიდი კონკურენციის მიუხედავად, ჟიურის წევრები ერთხმად შეთანხმდნენ, რომ დაფნის ნამუშევრის კონცეფცია საუკეთესო იყო.

გამარჯვების შემდეგ ბლეიდმა კომპანიისგან 120 ვიბრატორი მიიღო და ხელოვანიც მუშაობას შეუდგა. საბოლოოდ, შედეგი, არც მეტი, არც ნაკლები, Game of Thrones-ის რკინის ტახტის ასლი აღმოჩნდა. თუმცა, ბლეიდის თქმით, ამას დიდი დრო და ენერგია დასჭირდა — თითქმის მთელი დეკემბერი, დღეში 12-დან 15 საათის განმავლობაში მუშაობდა.

ფოტო: Vibratex

ტახტის ერთ მხარეს პორტალია გამოსახული, რომელზე უსქესო არსებას ხელში ვიბრატორი უკავია. ეს გამოსახულება, ბლეიდის თქმით, საკუთარ სექსუალობაზე სრული კონტროლის გამომსახველია.

ხელოვანი აღნიშნავს, რომ მისი მიზანი სამეფო ტახტის ანალოგის შექმნა არ ყოფილა, თუმცა, შედეგით უკმაყოფილო არაა.

ფოტო: Vibratex

სკულპტურა დაფნისთვის ხელოვნების დაუფარავი ნიმუშის შექმნის პირველი მცდელობა იყო, მაგრამ იგი აპირებს, თავის შემოქმედებაში სექსუალობის თემის ასახვა განაგრძოს. ბლეიდი ამბობს, რომ ხელოვნების სკოლა სულ ახლახან დაამთავრა და ამ ნამუშევრით აკადემიური სივრციდანაც გამოვიდა.

"ჩემთვის მნიშვნელოვანია, საკუთარი ხედვა მქონდეს, რათა ხელოვნება სწორედ მისი საშუალებით შევქმნა", — დასძენს დაფნი.