ნორვეგიულ ენაში ახალი, გენდერულად ნეიტრალური ნაცვალსახელი მიმდინარე წლის განმავლობაში დამკვიდრდება და შევა ოფიციალურ ლექსიკონებში. ამის შესახებ ქვეყნის ენის საბჭომ განაცხადა.

ნაცვალსახელი "Hen" მხოლობითი რიცხვის ნაცვალსახელების, "Hun" (მდედრობითი) და "Han" (მამრობითი), გენდერულად ნეიტრალური ალტერნატივა იქნება.

"დროთა განმავლობაში, ჩვენ ვნახეთ, რომ Hen-ის გამოყენება გახშირდა და ეს ნაცვალსახელი დამკვიდრდა", — აღნიშნავს ენის საბჭოს წარმომადგენელი, დანიელ იმსი.

გენდერულად ნეიტრალური ნაცვალსახელის დამკვიდრებაზე ლინგვისტურ საზოგადოებებში არაერთგვაროვანი აზრი არსებობს, არა მხოლოდ ნორვეგიაში, არამედ მსოფლიოს სხვა ქვეყნებშიც. ცოტა ხნის წინ, საფრანგეთის განათლების მინისტრმა, ჟან-მიშელ ბლანკემ, ფრანგული ენის განმარტებითი ლექსიკონის შემდგენლები "ამერიკული პროგრესულობის კვალდაკვალ" გენდერულად ნეიტრალური ნაცვალსახელის გამოცემაში შეტანისთვის გააკრიტიკა.

აშშ-ში კი ერთ-ერთმა ყველაზე დიდმა განმარტებითმა ლექსიკონმა, Merriam-Webster-მა, ჯერ კიდევ 2019 წელს შეიტანა თავის გამოცემებში მხოლობითი რიცხვის გენდერულად ნეიტრალური ნაცვალსახელი "They", რომელიც ასევე აღნიშნავს მრავლობითი რიცხვის მესამე პირის ნაცვალსახელს. მის ნორვეგიულ შესატყვისს, De-ს, ნორდიკულ ქვეყანაში ბევრი იყენებს. მათ შორისაა კარლ-ოსკარ ვიკი, რომელიც არაბინარული გენდერული იდენტობის მქონე პირია.

ვიკის თქმით, ახალდამკვიდრებული Hen-ის გამოყენების წინააღმდეგი არაა, თუმცა, მისთვის უფრო კომფორტული მაინც გენდერულად ნეიტრალური ნაცვალსახელის ძველებური ვერსიაა. იგი ასევე იმედოვნებს, რომ გენდერულად ნეიტრალური ნაცვალსახელის ოფიციალურად აღიარება ქვეყანაში მესამე გენდერის კანონიერად ცნობის წინაპირობა გახდება.