საგანგებო სიტუაციების მართვის სამსახურის ინფორმაციით, ყვარლის მუნიციპალიტეტში ორ კერაზე გავრცელებული ხანძარი ლიკვიდირებულა.

"ცეცხლი გავრცელებული იყო ორ კერად, ფოთლოვანი ტყის ქვედა საფარზე. რთული რელიეფის გამო, ხანძრის ქრობის სამუშაოები ცოცხალმა ძალამ ინდივიდუალური აღჭურვილობის საშუალებით დაიწყო. სიტუაციის შეფასების შემდეგ კი მოხერხდა კერების სიახლოვეს სპეციალური ტექნიკის მიყვანა", — აცხადებენ ისინი.

ამ დროისათვის ცალკეულ მხრჩოლავ კერებს ამუშავებენ. საგანგებო სიტუაციების მართვის სამსახურის ცნობით, ხანძრის სიახლოვეს დასახლებული პუნქტი არ ყოფილა და შემთხვევის შედეგად არავინ დაშავებულა.

ყვარლის ტყეში ხანძრის შესახებ ინფორმაცია გუშინ, პირველ თებერვალს გავრცელდა.