საქართველოს პრეზიდენტმა, გიორგი მარგველაშვილმა 91 მსჯავრდებული შეიწყალა, მათგან ოთხი ქალია. შესაბამის განკარგულებას მან ხელი დღეს მოაწერა. ამის შესახებ ინფორმაცია პრესკონფერენციაზე შეწყალების კომისიის თავმჯდომარემ, ზვიად ქორიძემ გაავრცელა.

პრეზიდენტის ადმინისტრაციის ინფორმაციით, შეწყალებულთაგან 62 მსჯავრდებული დღესვე დატოვებს თავისუფლების აღკვეთის დაწესებულებას. დანარჩენ 29 მსჯავრდებულს კი, შეფარდებული სასჯელი შეუმცირდება.

შეწყალების შესახებ განკარგულება პრეზიდენტის ადმინისტრაციამ სასჯელაღსრულებისა და პრობაციის საქმეთა სამინისტროს გადაუგზავნა.