რამდენიმე კვირის წინ გამოვიდა დისნეის რიგით მე-60 ანიმაცია Encanto, რომელმაც მალევე დაიპყრო მილიონობით მაყურებლის გული.

მართალია, ბევრი მოიხიბლა ამ მულტფილმში მოთხრობილი ისტორიით, მასში წარმოჩენილი უნიკალური პერსონაჟებითა და ზღაპრული ვიზუალური მხარით, მაგრამ როგორც დისნეის ანიმაციას შეეფერება, განსაკუთრებული მოწონება მაინც სიმღერებმა დაიმსახურა.

ყველაზე დიდი პოპულარობა სიმღერამ, სახელწოდებით We Don't Talk About Bruno, მოიპოვა: ამერიკულ მუსიკალურ ჩარტებში, Billboard-ის 100 ყველაზე მოთხოვნად სიმღერებს შორის, მეოთხე ადგილი დაიკავა, რითაც ისეთ ცნობილ სიმღერასაც გადაასწრო, როგორიცაა Frozen-ის ოსკაროსანი ჰიტი Let It Go.

ბოლო ოფიციალური ინფორმაციით, Encanto-ს საუნდტრეკს 30 მილიონზე მეტჯერ მოუსმინეს და თითქმის 10 000-ჯერ ჩამოტვირთეს. ეს მოულოდნელად კარგი შედეგია, რადგან 2014 წელს იდინა მენზელის მიერ შესრულებულმა Let It Go-მ ჩარტებში მე-5 ადგილის დაკავება შეძლო მხოლოდ.

აღსანიშნავია, რომ We Don't Talk About Bruno-ს სცენას იუთუბის პლატფორმაზეც უკვე 100 მილიონზე მეტი ნახვა აქვს.

ეს შედეგები, ალბათ, არც ისე მოულოდნელია, თუ გავითვალისწინებთ იმას, რომ ლათინურ-ამერიკული კულტურით შთაგონებული ამ ჯადოსნური ისტორიის შექმნაში დიდი წვლილი შეიტანა ლინ-მანუელ მირანდამ, რომელსაც ბევრი ბოლო დროის ერთ-ერთი ყველაზე პოპულარული მიუზიკლით — ჰამილტონი იცნობს: სწორედ მან დაწერა სიმღერები ამ მუსიკალური ანიმაციისთვისაც.

Encanto უკვე წლის საუკეთესო ანიმაციად დასახელდა ოქროს გლობუსზე და მისი ნახვა ჯერ კიდევ შეგიძლიათ ქართულ კინოთეატრებში დიდ ეკრანზე.