გიგი უგულავას შეფასებით, ხაზარაძე-ჯაფარიძე-წერეთლის საქმე იყო "სამართლებრივი თაღლითობა" პროკურატურის მხრიდან. ასე გამოეხმაურა ის მოსამართლის გადაწყვეტილებას, რომელმაც ე.წ. ფულის გათეთრების საქმეში ბრალდებულებს მუხლი გადაუკვალიფიცირა და თაღლითობაში სცნო დამნაშავედ.

"ხელისუფლებამ გადაწყვიტა, რომ ბოლომდე ბრუტალობაზე არ წასულიყო, იმიტომ, რომ ეს საერთაშორისო თვალსაზრისით, ისევე როგორც შიგნით — ისედაც კრიზისია — კიდევ უფრო მეტად პოლარიზაციას გამოიწვევდა სიტუაციის.

მეორე, სამართლებრივი მხარე — ჩვენ პირველივე დღიდან ვამბობდით, თითოეული ჩვენგანი, ყველა იურისტი, ომბუდსმენი, ყველა ექსპერტი, რომ თვითონ ეს საქმე იყო პროკურატურის მხრიდან სამართლებრივი თაღლითობა", — განაცხადა უგულავამ.

ხაზარაძე-ჯაფარიძე-წერეთელს ბრალი გადაუკვალიფიცირეს და ფულის გათეთრების ნაცვლად, დამნაშავედ თაღლითობაში ცნეს. მოსამართლემ მათ 7 წელი მიუსაჯა, თუმცა დანაშაულის ხანდაზმულობის გამო სასჯელი გაუუქმეს.

  • სამართალი ურმიდან გადმოვარდა — განაჩენი "დანაშაულზე", რომელზეც გამოძიებაც კი ვერ დაიწყებოდა

ბადრი ჯაფარიძესა და მამუკა ხაზარაძეს ბრალი სისხლის სამართლის კოდექსის 194-ე მუხლის მეორე ნაწილის "ა" და მესამე ნაწილის "გ" ქვეპუნქტით ედებოდათ, რაც ჯგუფურად ჩადენილ ფულის გათეთრებას გულისხმობს, რასაც თან ახლდა განსაკუთრებით დიდი ოდენობით შემოსავლის მიღება. თუმცა საბოლოო გადაწყვეტილებით, წარდგენილი ბრალი სისხლის სამართლის კოდექსის 180-ე მუხლის მეორე ნაწილის "ა" და მესამე ნაწილის "ბ" ქვეპუნქტზე გადაკვალიფიცირდა, რაც წინასწარი შეთანხმებით ჯგუფის მიერ ჩადენილ დიდი ოდენობით თაღლითობას გულისხმობს.

რაც შეეხება ავთანდილ წერეთელს, მას ბრალი სისხლის სამართლის კოდექსის 25-194-ე მუხლის მეორე ნაწილის "ა" და მესამე ნაწილის "გ" ქვეპუნქტით ედებოდა, რაც ჯგუფურად ჩადენილ ფულის გათეთრებაში ამსრულებლისა და თანამონაწილის პასუხისმგებლობას გულისხმობს, რასაც თან ახლდა განსაკუთრებით დიდი ოდენობით შემოსავლის მიღება. წარდგენილი ბრალი გადაკვალიფიცირდა სისხლის სამართლის კოდექსის 25-180 მუხლის მეორე ნაწილის "ა" და მესამე ნაწილის "ბ" ქვეპუნქტზე, რაც წინასწარი შეთანხმებით ჯგუფურად ჩადენილ დიდი ოდენობის თაღლითობაში ამსრულებლისა და თანამონაწილის პასუხისმგებლობას გულისხმობს.

სამივე მათგანი აპირებს საქალაქო სასამართლოს გადაწყვეტილების გასაჩივრებას. მოსამართლე გიორგი არევაძის გადაწყვეტილებას გაასაჩივრებს პროკურატურაც.