იაშვილის სახელობის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე ვარაუდობს, რომ კორონავირუსით ინფიცირების შემთხვევები იმაზე მეტი იქნება, ვიდრე პანდემიის მთელი პერიოდის განმავლობაში იყო.

მისივე თქმით, ნიღბის ტარება "ჩვენი ცხოვრების წესი" ვერ გახდა, ხოლო ორი დოზით ვაქცინირებულებისათვის ბუსტერიზაცია აუცილებლობად ვერ იქცა, რის გამოც, კორონავირუსის ახალ შტამს, ომიკრონს "ვერაფერი შეაჩერებს".

"შემთხვევების რაოდენობა იქნება ყველაზე მეტი პანდემიის მთელი პერიოდის განმავლობაში [...] ჩვენ, პრაქტიკულად რესურსი არ გვაქვს. ნიღბის ტარება ვერ გახდა ჩვენი ცხოვრების წესი და ვერ ვიყენებთ ამ ეფექტურ შესაძლებლობას. ბუსტერ დოზები იმ ადამიანებისთვის, ვისაც ორი დოზა აქვს გაკეთებული, ასევე, ვერ გახდა ის აუცილებლობა, რომელიც დეკემბრის ბოლოდან და იანვრის დასაწყისში უნდა ყოფილიყო განხორციელებული. ასე რომ პრაქტიკულად, ვერაფერი გააჩერებს ომიკრონს", — განაცხადა მან რუსთავი 2-თან.

დღეს, 9 იანვარს დაავადებათა კონტროლის ეროვნული ცენტრის ხელმძღვანელმა, ამირან გამყრელიძე განაცხადა, რომ კორონავირუსის დადასტურებული შემთხვევებიდან 10% ომიკრონია. მისივე თქმით, ახალი შტამის ლაბორატორიულად გამოვლენილი რაოდენობა დღესაც იგივე რჩება, თუმცა ასეულობით შემთხვევას იკვლევენ და სავარაუდოა, რომ მომავალ დღეებში ეს რიცხვი გაიზრდება. გამყრელიძე ამბობს, რომ ახალი შტამით ინფიცირების დადასტურებული 600 შემთხვევიდან ამ დრომდე, ჰოსპიტალში მხოლოდ 8 ადამიანი მოხვდა.

ჯანდაცვის სპეციალისტების პროგნოზით, თებერვალში კორონავირუსის ომიკრონის შტამი სრულად ჩაანაცვლებს არსებულ დელტა შტამს.

გაიგე მეტი: