პირველი იანვრიდან საფრანგეთში ახალი კანონი ამოქმედდა, რომელიც 30-მდე სახეობის ხილისა და ბოსტნეულის გასაყიდად პლასტმასის შესაფუთი მასალის გამოყენებას კრძალავს. გამონაკლისი მხოლოდ დიდი რაოდენობით ან დაჭრილი თუ სხვაგვარად დამუშავებული ხილ-ბოსტნეულია.

საფრანგეთში ხილისა და ბოსტნეულის მესამედზე მეტი მაღაზიის დახლებზე სწორედ პლასტმასის შეფუთვით იყიდება. ახალი ინიციატივის მიზანი პლასტმასის შესაფუთი მასალის გამოყენების შემცირება და 2040 წლამდე მისი წარმოებიდან ამოღებაა. პრეზიდენტმა ემანუელ მაკრონმა კანონს "ნამდვილი რევოლუცია" უწოდა.

ახალი კანონის მიღებისას გარემოს დაცვის მინისტრმა განაცხადა, რომ პლასტმასის ერთჯერადი შეფუთვები სხვა, გადამუშავებადი და მრავალჯერადი გამოყენების მასალით ჩანაცვლდება.

აღსანიშნავია, რომ 2021 წელს საფრანგეთში ერთჯერადი საწრუპები, ჭიქები და სამზარეულოს სხვა აქსესუარები აკრძალა. 2022 წლიდან კი კონკრეტულ დაწესებულებებში სასმელი წყლის ფანტანების დამონტაჟება გახდება სავალდებულო, რათა ერთჯერადი ბოთლებით სასმელი წყალი ნაკლებმა ადამიანმა იყიდოს.

მსგავსი აკრძალვის დაწესებას ევროპის კიდევ რამდენიმე ქვეყანაც აპირებს, რომელთა შორის ესპანეთიცაა. ქვეყანა 2023 წლიდან ხილ-ბოსტნეულის პლასტმასის ერთჯერადი მასალით შეფუთვას აკრძალავს.