მიხეილ სააკაშვილის უკრაინელი ადვოკატის, ევგენი გრუშოვეცის განცხადებით, ექსპრეზიდენტი რუსთავის პენიტენციურ დაწესებულებაში ძლიერი პრეპარატების ზემოქმედების ქვეშ გადაიყვანეს. ამის შესახებ მან Facebook-ზე დაწერა.

"წინა შემთხვევის მსგავსად, მიხეილ სააკაშვილი ძლიერი დამამშვიდებელი საშუალებებისა და პრეპარატების ზემოქმედების ქვეშ მყოფი გადაიყვანეს ციხეში. სწორედ ამის გამო არ შეუშვეს მასთან ექიმები, ადვოკატები და ომბუდსმენი", — წერს ის.

29 დეკემბერს გვიან ღამით სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

30 დეკემბერს, ექსპრეზიდენტის ადვოკატმა, ნიკა გვარამიამ რუსთავის პენიტენციურ დაწესებულებაში სააკაშვილის მონახულების შემდეგ განაცხადა, რომ სააკაშვილი ძალიან სუსტადაა და ის ყალბი დიაგნოზითაა გამოწერილი. მისივე თქმით, მესამე პრეზიდენტზე ფიზიკური ძალადობა არ განხორციელებულა. გვარამია ამბობს, რომ სააკაშვილს წინააღმდეგობის გაწევა არ შეეძლო, რადგან საძილე მედიკამენტებით იყო გაბრუებული და მაღალი წნევა ჰქონდა.