ექსპრეზიდენტ მიხეილ სააკაშვილის ადვოკატი ნიკა გვარამია რუსთავის პენიტენციურ დაწესებულებაში სააკაშვილის მონახულების შემდეგ აცხადებს, რომ მესამე პრეზიდენტზე ფიზიკური ძალადობა არ განხორციელებულა. გვარამია ამბობს, რომ სააკაშვილს წინააღმდეგობის გაწევის ძალა არ ჰქონდა, რადგან საძილე მედიკამენტებით გაბრუებული იყო და მაღალი წნევა ჰქოდა.

"ფიზიკური ძალადობა არ განხორციელებულა, მიხეილ სააკაშვილი იყო ძალიან დაუძლურებული. მას მიაკითხა ბევრმა ადამიანმა, როგორც თვითონ მითხრა ისე გეუბნებით, მიაკითხეს ეტლით და ჩასვეს ეტლში, მას წინააღმდეგობის გაწევის უნარი არ ჰქონდა. ჯერ ერთი, იყო გაბრუებული, როგორც ჩანს საძილე საშუალებები ჰქონდა მიღებული და ჰქონდა ჰქონდა მაღალი წნევა. როგორც წინა ჯერზე მითხრა, რომ აღელვების შემთხვევაში შეიძლება უარესი დამმართნოდაო, ამიტომ, არ გაუწევია მას წინააღმდეგობა, ზემოქმედება არ ყოფილა", — განაცხადა გვარამიამ.

მისივე თქმით, წამოსვლისას სააკაშვილს უთხრეს, რომ რუსთავში მიჰყავდათ, მაგრამ გზაში ცუდად თუ გახდებოდა გლდანის საავადმყოფოში გადაიყვანდნენ. ადვოკატი ამას წამებით დამუქრებას უწოდებს.

გუშინ, 29 დეკემბერს სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

ამავე თემაზე: