ეკონომიკის მინისტრი ნათია თურნავა პალიტრანიუსთან ინტერვიუში აცხადებს, რომ ანაკლიის ღრმაწყოვანი პორტის აშენებაზე ინვესტორებთან უკვე საუბრობენ. თურნავამ კიდევ ერთხელ გაიმეორა, რომ ანკლიის ღრმაწყლოვანი პორტი მათთვის სტრატეგიული პროექტია.

"იმდენად სერიოზულად ვეკიდებით ამ სტრატეგიულ პროექტს, იმდენად სწორად უნდა გავთვალოთ ჩვენი შემდგომი ნაბიჯი, რომ ეს იყოს 100%-იანი წარმატება. ჩვენ არ ვუდგებით ამ პროექტს ფორმალისტურად. ფორმალისტურად შეგვძელო რამდენიმეჯერ, 2020-21 წელს თუნდაც გამოგვეცხადებინა ტენდერი იგივე პირობებით რაც იყო... ბევრი დამამძიმებელი გარემოებებია ამ პროექტის ირგვლივ (პანდემია, ხაზარაძე-ჯაფარიძის საქმე) და ამ პირობებში რომ გამოგვეცხადებინა, ის დიდი ალბათობით ჩავარდებოდა. აქედან გამომდინარე ჩვენ მივუდექით ამ საქმეს გაცილებით სერიოზულად", — ამბობს თურნავა.

მისივე თქმით, კონსულტანტად დანიური საერთაშორისო კომპანია აიყვანეს, რომელმაც ტექნიკურ-ეკონომიკური კვლევა, ტვირთების მოზიდვის პერსპექტივა და გეგმა, პრაქტიკულად, განაახლა.

"გვაქვს ახლა უკვე განახლებული ტექნიკურ-ეკონომიკური კვლევა, რომლითაც ჩვენ შეგვიძლია ნებისმიერ ინვესტორს ვესაუბროთ და გაგიმხელთ, რომ ვსაუბრობთ უკვე ინვესტორებთან, იმიტომ, რომ ვიდრე ჩვენ ფორმალურ პროცესს გამოვაცხადებთ, უნდა ვიცოდეთ, რომ რამდენიმე ჯგუფი სერიოზული მსოფლიოში არის პოტენციურად დაინტერესებული", — აღნიშნავს ეკონომიკის მინისტრი.

თურნავას თქმით, არის არის საინტერესო, ახლებური გადაწყვეტა ამ პროექტის სტრუქტურაში.

"ჩვენ ვფიქრობთ, რომ პროექტი უნდა იყოს უფრო მეტად სახელმწიფო ჩართულობასა და სახელმწიფო საკუთრებაზე დამყარებული. აქამდე რა მოდელიც იყო, იყო წმინდა კერძო პორტის მოდელი. ჩვენ შეიძლება წავიდეთ შერეული მოდელით და ამით უფრო მეტად საინტერესოს გავხდით ამ პროექტს და გარდა ამისა, სახელწმიფო შეინარჩუნებს ამ სტრატეგიული ობიექტის მნიშვნელოვან ნაწილს თავის საკუთრებაში", — აცხადებს თურნავა.

საქართველოს მთავრობის გადაწყვეტილების საფუძველზე, ანაკლიის განვითარების კონსორციუმთან ხელშეკრულება ოფიციალურად 2020 წლის 9 იანვარს შეწყდა. რეგიონული განვითარებისა და ინფრასტრუქტურის სამინისტროში მიზეზად კონსორციუმის მხრიდან აღებული ვალდებულებები შეუსრულებლობა დაასახელეს.

ანაკლიაში შავი ზღვის ღრმაწყლოვანი ნავსადგურის მშენებლობაზე საქართველოს მთავრობასა და ანაკლიის განვითარების კონსორციუმს შორის ხელშეკრულება 2016 წლის 3 ოქტომბერს გაფორმდა.

ანაკლიის პორტის სამომავლო განხორციელებასთან დაკავშირებით კითხვები თიბისი ბანკის საქმემ გააჩინა. თიბისი ჰოლდინგ საქართველო ანაკლიის განვითარების კონსორციუმის წევრია. მას შემდეგ, რაც პროკურატურამ ფულის გათეთრების ბრალდებით დაკავშირებით გამოძიება დაიწყო, თიბისი ბანკის სამეთვალყურეო საბჭოს წევრებმა, ბადრი ჯაფარიძემ და მამუკა ხაზარაძემ ივარაუდეს, რომ ეს პროცესები ანაკლიის პორტის პროექტის ჩაშლისკენ იყო მიმართული. პროკურატურამ განმარტა, რომ თიბისი ბანკის 2008 წლის აქტივობები ფულის გათეთრების ნიშნებს შეიცავდა.

21 თებერვალს მამუკა ხაზარაძემ და ბადრი ჯაფარიძემ თანამდებობები დატოვეს. ეროვნული ბანკში კი განაცხადეს, რომ ხაზარაძის წასვლას მიესალმებიან. მათი თქმით, ეს ბანკის გამჭვირვალობაზე დადებითად აისახება. მოგვიანებით ისინი ანაკლიის პორტის მმართველ საბჭოში თავმჯდომარისა და თავმჯდომარის მოადგილის პოსტებიდანაც წავიდნენ. დღეს ისინი პარტია ლელოს ლიდერები არიან.