ნაციონალური მოძრაობის წევრის, ლევან ხაბეიშვილის განცხადებით, მისი, როგორც მართლმადიდებლის სურვილი და მოთხოვნაა, რომ ექსპრეზიდენტის გარშემო მიმდინარე მოვლენებში პატრიარქი, ილია მეორეს ჩაერთოს. მისი თქმით, ის ერთადერთია, ვისაც პრეზიდენტ სალომე ზურაბიშვილის გარდა, ქვეყანაში კრიზისის განმუხტვა შეუძლია.

"ვფიქრობ, რომ ეს ხალხი ხელს აწერს სააკაშვილის მკვლელობაზე და ამასობაში, მგონია, რომ პატრიარქს უნდა ჰქონდეს რეაგირება. ეს ჩემი, ერთი, რიგითი, მართლმადიდებელი ადამიანის სურვილიც არის და მოთხოვნაც, რომ ამ საქმეში ჩაერთოს მათ შორის, პატრიარქი და მისი ავტორიტეტიდან გამომდინარე, კონკრეტული გადაწყვეტილებებიც მიიღოს და კონკრეტული ნაბიჯებიც გადადგას. ეს არის ჩემი მოწოდებაც, ჩემი თხოვნაც და ჩემი მოთხოვნაც", — განაცხადა მან ფორმულასთან.

გვიან ღამით სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

დღეს, 30 დეკემბერს ექსპრეზიდენტის ადვოკატმა, ნიკა გვარამიამ რუსთავის პენიტენციურ დაწესებულებაში სააკაშვილის მონახულების შემდეგ განაცხადა, რომ სააკაშვილი ძალიან სუსტადაა და ის ყალბი დიაგნოზითაა გამოწერილი. მისივე თქმით, მესამე პრეზიდენტზე ფიზიკური ძალადობა არ განხორციელებულა. გვარამია ამბობს, რომ სააკაშვილს წინააღმდეგობის გაწევა არ შეეძლო, რადგან საძილე მედიკამენტებით იყო გაბრუებული და მაღალი წნევა ჰქონდა.