პარტია მოქალაქეების ლიდერის, ალეკო ელისაშვილის განცხადებით, არაფერია გასაკვირი იმაში, რომ ყოფილი პრეზიდენტი, მიხეილ სააკაშვილი ციხეში გადაიყვანეს. მისი თქმით, თუ ექსპრეზიდენტმა კვლავ შიმშილობა დაიწყო, იქნება ძალიან გაუგებარი.

"პატიმარი რომ ციხეში გადაიყვანეს, ამაში რა არის განსაკუთრებული და უცნაური. ვერანაირ განადგურების მცდელობას ვერ ვხედავ, პატიმარი გადაიყვანეს ციხეში, რომელმაც იმკურნალა და აღარ არის მძიმე მდგომარეობაში. [...] სასამართლო პროცესზე რაც ვნახეთ, განადგურებულის არაფერი ეტყობოდა, ჯანმრთელად იყო, გადაიყვანეს. წავიდეს სტრასბურგში, გაიმართლოს თავი, გამოვიდეს ციხიდან.

ისევ თუ შიმშილობა დაიწყო, იქნება ძალიან უხერხული, ჩემი აზრით. და გაუგებარი პირადად ჩემთვის. ახლა რაზე უნდა იშიმშილოს? რატომ უნდა იშიმშილოს? მაშინ ყველა პატიმარი იშიმშილებს, გამომიშვით ციხიდანო", — თქვა ელისაშვილმა.

გუშინ, 29 დეკემბერს სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება უწყებამ მხოლოდ ახლა გაავრცელა.

დღეს პენიტენციურმა სამსახურმა ინფორმაციის გავრცელებიდან 9 საათის შემდეგ, დაადასტურა, რომ სააკაშვილი რუსთავის ციხეშია