ჯანდაცვის მინისტრის, ეკატერინე ტიკარაძის განცხადებით, 2022 წლიდან თბილისისა და რეგიონების სასწრაფო დახმარების ბრიგადების ხელფასები თანაბრდება.

"ჩვენ ვხედავთ, რომ ტენდენცია არის ზრდის ხელფასების და 2014 წლის შემდეგ 160%-ით არის ხელფასები გაზრდილი, ასევე, არის გაზრდილი სოფლის ექიმების ხელფასები, თუმცა აქაც ვაწყდებით იმ პრობლემას, რომ ეს ხელფასები არაა თანაბარი თბილისსა და რეგიონში და რა თქმა უნდა, ჩნდება კითხვა, ასევე, პერსონალში უსამართლობის განცდა., რომ როდესაც ერთნაირ სამუშაოს ასრულებენ, რატომ უნდა იყოს ასეთი არათანაბარი მიდგომა სახელმწიფოს მხრიდან.

2022 წლიდან უკვე თანაბრდება თბილისისა და რეგიონების სასწრაფო დახმარების ბრიგადების ხელფასები და რა თქმა უნდა, მათთვისაც ჩვენ არ დაგვიწყებია მადლიერების ნიშნად 50% ოდენობის ანაზღაურების დამატება. დავაკონკრეტებ, რომ ეს მადლიერების ნიშანი არ არის, ეს არის მათი კუთვნილი ანაზღაურება, რომლის მიცემის ვალდებულებაც ჩვენ გვქონდა და ესეც მიმდინარეობს", — განაცხადა მინისტრმა.

ჯანდაცვის მინისტრი ეკატერინე ტიკარაძე დღეს, 26 დეკემბერს სამინისტროს შემაჯამებელ ანგარიშს წარადგენს.