სახელმწიფო უსაფრთხოების სამსახურის განცხადებით, ანტიკორუფციული სააგენტოს თანამშრომლების მიერ, უნებართვო არქეოლოგიური სამუშაოების საქმეზე მიმდინარე
გამოძიების ფარგლებში, დავით აღმაშენებლის პერიოდის მონეტა ამოიღეს.

უწყების ცნობით, მონეტის ავთენტურობის დასადგენად ჩატარდა საექსპერტო კვლევა და დადგინდა, რომ სპილენძისგან დამზადებული მონეტა მოჭრილია დავით მეოთხე აღმაშენებლის მიერ და არის ორიგინალი.

"მიუხედავად იმისა, რომ საქმეზე გამოძიება გრძელდება და მონეტა წარმოადგენს ნივთმტკიცებას, როგორც განსაკუთრებული ისტორიული ფასეულობის კულტურული მემკვიდრეობა, სათანადო პირობებში შესანახად და საზოგადოებისთვის ხელმისაწვდომობის უზრუნველსაყოფად იგი გადაეცემა საქართველოს ეროვნულ მუზეუმს", — ვკითხულობთ განცხადებაში.

მათივე ინფორმაციით, გამოძიების ფარგლებში, ასევე, ამოღებულია, ისტორიული, კულტურული და მეცნიერული ღირებულების მქონე სხვადასხვა არტეფაქტი, რომელთა საბაზრო ღირებულების დადგენა შეუძლებელია.

ამოღებულ არტეფაქტებს შორის არის:

  • 12 ერთეული ბეჭედი;
  • ბრინჯაოს გულსაკიდი ზანზალაკი;
  • 6 ერთეული ორიგინალი ღილი;
  • სხვადასვა პერიოდის მონეტა.

სუს ცნობით, აღნიშნული მონეტებიდან 3 ნივთი წარმოადგენს საბჭოთა პერიოდს, 3 მონეტა კი XIII საუკუნით თარიღდება.