"ჯადოქრობის შესახებ დადგენილების" გაუქმებიდან სამი საუკუნის შემდეგ, შოტლანდიაში კუდიანობის ბრალდებით დასჯილი ათასობით ადამიანი შეიწყალეს. დაახლოებით, 3 837 გასამართლებულიდან უმრავლესობა, თითქმის 84 პროცენტი, ქალი იყო, მათი ორი მესამედი კი ცოცხლად დაწვეს.

XVI-XVIII საუკუნეებში შოტლანდიაში ათასობით ადამიანს ადანაშაულებდნენ ეშმაკთან შეკრულობასა და ალქაჯობაში. მათ ხან მეფის გემების დაწყევლას, ხან ცხოველად გადაქცევას და ხანაც დემონთან ცეკვას მიაწერდნენ ხოლმე.

შოტლანდიის ჯადოქართა მოძრაობა გვიანდელ შუა საუკუნეებში დახოცილი ადამიანების შეწყალებას ორი წლის განმავლობაში კამპანიით ითხოვდა. ამას წინ უძღოდა მასაჩუსტესტის წარმომადგენელთა პალატის მიერ სალემის სამსაჯვროების დროს გასამართლებული და დასჯილი ადამიანების შეწყალება 2001 წელს. საბოლოოდ, შოტლანდიის პირველი მინისტრის, ნიკოლა სტარჯონის ხელმძღვანელობით, პარლამენტმა მოთხოვნა ცოტა ხნის წინ დააკმაყოფილა.

"კუდიანების" დევნა შოტლანდიაში 1563 წელს გამოცემული ჯადოქრობის შესახებ დადგენილებით დაიწყო. ეს დადგენილება ორი საუკუნის შემდეგ, 1736 წელს გაუქმდა, თუმცა, მანამდე "კუდიანებზე ხუთი დიდი შოტლანდიური ნადირობა" და რამდენიმე საჯარო სასამართლო მოიცვა.

ჯადოქრების დევნა შოტლანდიის მეფე ჯეიმს VI-მ დაიწყო, რომელსაც მიაჩნდა, რომ თავისი გემების ჩაძირვაში სწორედ მაგია იყო გარეული. მას შემდეგ ჯადოქრობა სასიკვდილო დანაშაულად იქცა, მსგავს ქმედებაში დადანაშაულებულების უმეტესობას კი საზარელი ბედი და წამებით სიკვდილი ეწია. როგორც შოტლანდიის ჯადოქართა მოძრაობის ხელმძღვანელი, კლერ მიჩელი აცხადებს, XVI საუკუნიდან XVIII საუკუნემდე პერიოდში შოტლანდიაში ერთ სულ მოსახლეზე გაანგარიშებით იმაზე ხუთჯერ მეტი ადამიანი დასაჯეს ჯადოქრობის ბრალდებით, ვიდრე ევროპის ნებისმიერ სხვა მხარეში.