თურქეთის საგარეო საქმეთა მინისტრი მევლუთ ჩავუშოღლუ იმედს გამოთქვამს, რომ საქართველო 3+3 ფორმატის მომდევნო შეხვედრაში მიიღებს მონაწილეობას, რომელიც შესაძლოა თურქეთში გაიმართოს.

"ჩვენ (აზერბაიჯანის საგარეო საქმეთა მინისტრი) ჯეიჰუნ ბაირამოვი და მე გავცვალეთ მოსაზრებები მოსკოვში 3+3 ფორმატში რეგიონული კონსულტაციების გამართვასთან და ბოლო მოვლენებთან დაკავშირებით. ჩვენ მოუთმენლად ველით შემდეგი შეხვედრის გამართვას თურქეთში და ვიმედოვნებთ, რომ მას საქართველოც შეუერთდება, — განაცხადა ჩავუშოღლუმ.

რუსული სააგენტო რია ნოვოსტის თანახმად, ამის შესახებ ჩავუშოღლუმ ჟურნალისტებს 19 დეკემბერს ისლამაბადში განუცხადა, სადაც ისლამური თანამშრომლობის ორგანიზაციის წევრი ქვეყნების საგარეო საქმეთა მინისტრები ავღანეთში შექმნილ ვითარებას განიხილავდნენ.

3+3 ფორმატის პირველი შეხვედრა მოსკოვში 10 დეკემბერს გაიმართა. მასში საქართველო არ მონაწილეობდა, თუმცა შეხვედრაზე დროშა მაინც დაკიდეს. დროშის დაკიდებას საქართველოს საგარეო საქმეთა სამინისტრო გამოეხმაურა და თქვა, რომ ეს მათთვის მიუღებელია.

რუსეთის საგარეო უწყების განცხადებით, მიუხედავად იმისა, რომ საქართველო შეხვედრას არ ესწრება, მისთვის კარი ღია რჩება.

3+3 ფორმატი მთიანი ყარაბაღის მეორე ომის შემდეგ, თურქეთის პრეზიდენტის ინიციატივით, შეიქმნა. მასში მონაწილეობს რუსეთი, თურქეთი, აზერბაიჯანი, სომხეთი და ირანი და ის რეგიონული ფორმატის თანამშრომლობას გულისხმობს.

7 ოქტომბერს საგარეო საქმეთა მინისტრმა, დავით ზალკალიანმა განაცხადა, რომ "ძალიან ძნელია დაჯდე ამ ფორმატში" რუსეთთან ერთად ოკუპაციის პირობებში. თუმცა, აღნიშნა ისიც, რომ აუცილებელია, საქართველო ჩართული იყოს ყველა მნიშვნელოვან რეგიონულ პროექტში, მაგრამ "არა სახელმწიფო ინტერესების და ოკუპანტთან რაღაცა დათმობის ხარჯზე". მინისტრის ნათქვამმა კრიტიკა გამოიწვია. პასუხად საგარეო საქმეთა სამინისტრომ განაცხადა, რომ ზალკალიანის ინტერვიუს არასწორი ინტერპრეტაცია მოჰყვა და არ განიხილავენ ე.წ. 3+3 ფორმატში მონაწილეობას რუსეთთან ერთად.