რუმინელი ქალი, ანდრეა კრისტა, საავადმყოფოში გარდაიცვალა. ის ლონდონის ტერაქტის მეხუთე მსხვერპლია. ინფორმაციას BBC ავრცელებს.

22 მარტს, ის ლონდონში თავის შეყვარებულთან ერთად დასასვენებლად იმყოფებოდა, როდესაც ვესტმინსტერის ხიდზე ტერორისტი მანქანით ხალხში შევარდა. თავდასხმისას კრისტა ხიდიდან გადახტა.

ოფიციალური პირების თქმით, კრისტა გადახტომის შედეგად მიღებული დაზიანებებით გარდაიცვალა. მის გამოსაჯანმრთელებლად შეგროვებული თანხა ოჯახმა საქველმოქმედო ორგანიზაციას გადასცა.

ანდრეა კრისტას შეყვარებულს ანდრეი ბურნაზს თავდასხმის შედეგად ფეხი ჰქონდა მოტეხილი და ის უკვე გაწერილია საავადმყოფოდან. ინგლისში რუმინეთის ელჩის თქმით, თავდასხმის დღეს კრისტასთვის მის შეყვარებულს ხელი უნდა ეთხოვა.