გუდაურში მომხდარი მკვლელობის საქმეზე დაკავებული მერაბ კობიაშვილი ნაფიცმა მსაჯულებმა გაამართლეს. On.ge-ის ინფორმაცია გორის რაიონულ სასამართლოში დაუდასტურეს.

გამოძიება მას განზრახ მკველობას ედავებოდა. ბრალდებულის ადვოკატის, ჯაბა კოჭლამაზაშვილის განცხადებით, სასამართლომ კობიაშვილი გაამართლა, რადგან ის თავს იცავდა. კობიაშვლის თქმით კი, მას განზრახ მკვლელობა არ ჩაუდენია და ასეთ განაჩენს ელოდებოდა.

"ამ გადაწყვეტილებას აუცილებლად ველოდებოდი, იქიდან გამომდინარე, რომ მე არ ჩამიდენია განზრახ მკვლელობა. ეს არის ძალიან დიდი ტრაგედია, რომელიც მხრებით უნდა ვატარო, მთელი ცხოვრება. მინდა, დიდი მადლობა გადავუხადო ნაფიც მსაჯულებს, სწორი გადაწყვეტილებისთვის, სიმართლისთვის. მეტს ვერაფერს ვერ გეტყვით, ცოტა ემოციებში ვარ, საერთოდ არ ვარ ლაპარაკის ხასიათზე", — თქვა კობიაშვილმა

მოკლულის დედა კი აცხადებს, რომ აუცილებელია ყველა მკვლელი საკმარისად დაისაჯოს, რათა, ასეთი შემთხვევები აღარ განმეორდეს.

"მაგას იმდენი ხალხი იცავს და იმდენი ხალხი ჰყავს, რომ ჩვენ იმასთან ნოლები ვართ, უფალს ვეხვეწები, ღმერთმა გასცეს პასუხი ჩემი შვილის გამო", — თქვა მან.

გუდაურში მკვლელობა 2020 წლის 16 თებერვალს მოხდა. გამოძიება სისხლის სამართლის 108-ე განზრახ მკვლელობის მუხლით იყო დაწყებული. იმავე დღეს შინაგან საქმეთა სამინისტრომ განაცხადა, რომ მკვლელობის ბრალდებით ერთი პირი დააკავეს.