თბილისის მერის, კახა კალაძის განცხადებით, "მიტაცებულ მიწებზე" უკანონო მშენებლობების დემონტაჟი განხორციელდება. მისი თქმით, მოქალაქეებს უკანონოდ აშენებული შენობის დანგრევის საშუალება თავადვე ექნებათ, თუმცა თუ ამას არ გააკეთებენ მუნიციპალური ინსპექცია და შესაბამისი სამსახურები კანონის შესაბამისად იმოქმედებენ.

"არასდროს შევეგუებით უკანონობას. არასდროს შევეგუებით გარკვეული კრიმინალური ჯგუფების მხრიდან დედაქალაქის მასშტაბით მიწების მიტაცებას და ამ მიწებზე შემდეგ უკანონო მშენებლობების განხორციელებას. ეს მიწები არის ჩვენი ყველასი, ამ ქალაქში და ამ ქვეყანაში მცხოვრები ადამიანების", — განაცხადა მან.

კალაძე ამბობს, რომ უკანონო მშენებლობების კონკრეტული მაგალითები აქვთ. მისი თქმით, მიუხედავად იმისა, თუ ვინ ახორციელებს უკანონო მშენებლობას, სახელმწიფო, მუნიციპალიტეტი, თუ კერძო მესაკუთრე, მსგავსი ფაქტები მიუღებელია.

"მინდა დავავალო მუნიციპალური ინსპექციის ხელმძღვანელს, კახა გულედანს, რომ ძალიან სწრაფი რეაგირება, როგორც ყოველთვის ვაკეთებთ. მიეცით ამ ადამიანებს იმის შესაძლებლობა, რომ თავადვე მოახდინონ დემონტაჟი გარკვეულ ვადაში, წინააღმდეგ შემთხვევაში განახორციელონ ამ მშენებარე ნაგებობების დემონტაჟი. კატეგორიულად მიუღებელია და ჩვენ არ დავუშვებთ, ძალიან პრინციპულები ვიქნებით ასეთი უკანონობის წინააღმდეგ", — თქვა მან თბილისის მთავრობის სხდომაზე.

ასეთი განცხადება კალაძემ 23 დეკემბერსაც გააკეთა. თქვა, რომ ქალაქის მთავრობის ვალდებულებაა დაიცვას სახელმწიფო საკუთრებაში არსებული მიწები უკანონო შენობა-ნაგებობებისგან და დაუშვებელია მსგავსი ფაქტების გამართლება ადამიანების გაჭირვებით. იმავე დღეს მერიამ აფრიკის დასახლებაში, თვალჭრელიძის ქუჩაზე უნებართვოდ აშენებული სახლები დაანგრია.