თბილისის მერია თვალჭრელიძის ქუჩაზე უნებართვოდ აშენებულ სახლებს ანგრევს. ამის შესახებ ინფორმაციას რადიო თავისუფლება ავრცელებს.

"მეძინა, გამომაგდეს და დამინიგრიეს სახლი, რა უნდა ვთქვა. 7 იყო ამ დილით, უთენია, რომ მოვიდნენ. საწოლები და რაღაცები გამოვიტანეთ რაც მოვასწარით, დანარჩენი დალეწეს ყველაფერი", — ამბობს ერთ-ერთი მაცხოვრებელი.

18 დეკემბერს თბილისის მერიაში განაცხადეს, რომ სამგორის რაიონში, თვალჭრელიძის ქუჩის მიმდებარედ, სახელმწიფო მიწაზე 7 უკანონო მშენებარე შენობა-ნაგებობა დააფიქსირეს. მათი ინფორმაციით, ინსპექციის თანამშრომლებმა, ვინაიდან მაცხოვრებლები ტერიტორიაზე არ იმყოფებოდნენ, ობიექტებზე გამაფრთხილებელი მოთხოვნები გამოაკრეს და იქ მაცხოვრებლებს მოუწოდეს, განეხორციელებინათ მშენებლობების დემონტაჟი. წინააღმდეგ შემთხვევაში კი თბილისის მუნიციპალური ინსპექცია შენობა-ნაგებობების დემონტაჟს აანონსებდა.