ყველა განსხვავებული იდეა თავდაპირველად სკეპტიკურ დამოკიდებულებას იწვევს ადამიანებში, თუმცა თუ მის ავტორს სჯერა საკუთარი წარმატების, ადრე თუ გვიან ამაში გარშემომყოფებიც დარწმუნდებიან. ასე მოხდა ეთერ კაპანაძის შემთხვევაშიც, რომელმაც საქართველოში ერთ-ერთმა პირველმა შექმნა იხვის ფერმა და დღეს უკვე Shark Tank-ის გამარჯვებულია.

"სამსახურიც მქონდა, რამდენიმე ჰობიც, ოჯახიც, თუმცა გარკვეული თავისუფალი დრო მაინც მრჩებოდა. სოფლის სახლის ეზოს ბოლომდე ვერ ვიყენებდით, ამიტომ ახალი საქმიანობის წამოწყება გადავწყვიტე. ერთ დღესაც ძალიან საინტერესო სიუჟეტს წავაწყდი იხვების შესახებ და მაშინვე მივხვდი, რომ ამ საქმისთვის უნდა მომეკიდებინა ხელი. თავდაპირველად, ყველასგან სკეპტიკური დამოკიდებულება მივიღე, თუმცა ჩემი იდეის მჯეროდა და 100 იხვის ჭუჭული შევიძინე. ნელ-ნელა ვსწავლობდი მათ მოვლას, საქმიანობას ყოველდღე საკმაოდ დიდ დროს ვუთმობდი. პირველი წარმატება მაშინ მოვიდა, როდესაც 30 ფრთის გაყიდვა დამჭირდა, რადგან ფიზიკურად მათი ადგილი სახლში აღარ იყო. 1 დღეში ყველა გაიყიდა და მივხვდი, რომ ყველაფერი მხოლოდ ახლა იწყებოდა", — გვიყვება ეთერი.

ამჟამად ფერმაში უკვე 400 ფრთა იხვი ჰყავს, აქტიურად ყიდის კვერცხს, რომელიც ორჯერ უფრო მეტ ვიტამინს შეიცავს, ვიდრე ქათმის კვერცხი და ასევე საკონდიტრო საქმიანობაშიც აქტიურად გამოიყენება. 2.5 წლის განმავლობაში იხვის ხორცი საკმაოდ პოპულარული გახდა საქართველოში და ეთერ კაპანაძის ფერმამაც ამ საქმეში საკმაოდ დიდი წვლილი შეიტანა.

"ამ დროისთვის უკვე გვყავს არაერთი მომხმარებელი მათ შორის, როგორც ფიზიკური პირი, ისე კაფე-რესტორანი. სეზონზე იხვის ჭუჭულებსაც ვყიდით, შეგვიძლია ცოცხალი იხვის და კვერცხის გაყიდვა", — ამბობს ეთერი.

როგორც თავად გვიყვება, პროდუქციას ძირითადად ონლაინ ყიდის. დროთა განმავლობაში მისი საქმიანობით არაერთი ტელევიზია დაინტერესდა, მათი სიუჟეტების წყალობით კი ეთერის იხვის ფერმა მთელმა საქართველომ გაიცნო. გარდა ამისა, ეთერი ცდილობს, რომ იხვები მაქსიმალურად ბუნებრივი საკვებით გაზარდოს, რაც პროდუქტის ხარისხს აუმჯობესებს. ნელ-ნელა ერთგული მომხმარებლებიც შეიძინა და გადაწყვიტა უფრო მეტად გაფართოებულიყო.

"სანამ პროექტში მივიღებდი მონაწილეობას, უკვე იმდენად გავფართოვდით, რომ ყველა საქმეს ჩემი რესურსი აღარ ჰყოფნიდა. მჭირდებოდა შეძლებული და გამოცდილი პარტნიორი, რომელიც ბიზნესის განვითარებაში დამეხმარებოდა. დარწმუნებული ვიყავი, რომ Shark Tank ამაში ხელს შემიწყობდა და ასეც მოხდა. 150,000 ლარის სანაცვლოდ 30%-იანი წილის გაყიდვას დავთანხმდი. იდეით მენი ბენეში დაინტერესდა, რომელმაც ყველანაირი პირობა დამიკმაყოფილა და სამომავლოდ ხანგრძლივი თანამშრომლობა შემომთავაზა, მეც მაშინვე დავთანხმდი", — ამბობს ეთერი.

მისი თქმით, მოზიდული თანხით ინკუბატორების შეძენას აპირებს, რათა მომავალში იხვის რაოდენობა 5-10 ათასამდე გაიზარდოს, რასაც ახალი შენობაც დასჭირდება.

"უამრავი რუტინული საქმიანობა დაგროვდა, რომელსაც მხოლოდ ჩემი რესურსი აღარ ჰყოფნის, ამიტომ სამომავლოდ ადამიანების დასაქმებასაც ვგეგმავთ. დარწმუნებული ვარ, რომ იდეა გაამართლებს. ამ პერიოდის განმავლობაში რამდენიმე ასეულ მომხმარებელს მოვემსახურეთ, უკვე 2 სხვადასხვა ონლაინ პლატფორმაზე ვყიდით ჩვენს პროდუქტს და გაჩერებას არ ვაპირებთ. ამ პროექტის დახმარებით ჩემი იდეის უკვე ყველას სჯერა, რაც ძალიან მახარებს", — ამბობს ეთერი

მიუხედავად იმისა, რომ საქართველოში იხვის ხორცი დასავლურ სამზარეულოში გამოიყენება, ის ბაზრისთვის მაინც ახალ პროდუქტად ითვლება. შედარებით განსხვავებული სიტუაციაა გლობალურ ბაზარზე, სადაც ბაზრის ზომა 2021-2024 წლებში სავარაუდოდ, 1.31 მილიარდ დოლარს გადააჭარბებს. დედამიწის მოსახლეობის ზრდასთან ერთად იმატებს ხორცზე და ხორცპროდუქტებზე მოთხოვნაც, რაშიც იხვის ხორციც მოიაზრება. Statista-ს ინფორმაციით, 2025 წლისთვის გლობალური ხორცის ბაზრის ზომა 1 ტრილიონ დოლარს გადააჭარბებს, რაც უდიდეს შესაძლებლობას ნიშნავს ტრადიციული ბიზნესის წარმომადგენლებისთვის.

შეგახსენებთ, საქართველოს პირველ არხზე შარქ თენქ საქართველოს გენერალური პარტნიორი საქართველოს ბანკია. SONY Pictures-ის რეალითი შოუ — Shark Tank ერთ-ერთი ყველაზე პოპულარული შოუა, რომელმაც 5 კონტინენტი მოიცვა. ის უკვე 13 სეზონია მაყურებლების ერთ-ერთ ფავორიტ გადაცემად რჩება. 4 ემის მფლობელი შოუ საქართველოს სატელევიზიო სივრცეში პირველად გადის.