NATO-ს გენერალური მდივანმა იენს სტოლტენბერგმა ბრიუსელში პრემიერმინისტრ ირაკლი ღარიბაშვილთან ერთობლივ კონფერენციაზე განაცხადა, რომ მზად არიან საზღვაო მიმართულებითა და ინფორმაციის გაზიარების კუთხით საქართველოს თავდაცვისა და უსაფრთხოების შესაძლებლობები განვამტკიცონ. სტოლტენბერგმა, ასევე, აღნიშნა, რომ NATO-სა და საქართველოს მჭიდრო პარტნიორობა აკავშირებთ, ალიანსის მოკავშირეებმა კი რიგაში მტკიცედ დაადასტურეს, რომ საქართველოს სუვერენიტეტი და ტერიტორიული მთლიანობა ურყევია.

"ვაგრძელებთ რუსეთის მოწოდებას, დათმოს აფხაზეთის და სამხრეთ ოსეთის რეგიონები და გაიყვანოს სამხედრო ძალები. დღეს ჩვენ განვიხილეთ რეგიონში არსებული ვითარება, უკრაინის ტერიტორიაზე რუსეთის არსებობის და შავი ზღვის უსაფრთხოების საკითხები. ვთანხმდებით, რომ NATO ფხიზლად იქნება და რეგიონში ესკალაციას თავიდან აიცილებს. რუსეთს რეგიონში ნებისმიერი აგრესია ძვირად დაუჯდება. საქართველოს და უკრაინას უფლება აქვთ, თვითონ აირჩიონ თავიანთი მოკავშირეები და რუსეთს არ აქვს უფლება, რომ ამ ორი ქვეყნის არჩევანზე რაიმე გავლენა მოახდინოს. ევროპაში ჩვენ ვგრძნობთ, რომ ორივე ქვეყანა ისტორიის ნაწილია. NATO გააგრძელებს პარტნიორებისთვის ძლიერი პოლიტიკური და პრაქტიკული დახმარების უზრუნველყოფას. ჩვენ მზად ვართ, რომ საქართველოს თავდაცვის და უსაფრთხოების შესაძლებლობები განვამტკიცოთ საზღვაო მიმართულებით და ინფორმაციის გაზიარების კუთხით", — განაცხადა იენს სტოლტენბერგმა.

NATO-ს გენერალური მდივნის თქმით, წლების განმავლობაში ავღანეთში საქართველოსა და NATO-ს პარტნიორობა სამაგალითო იყო, ეროვნულ ტერორიზმს ებრძოდნენ ერთად და წელს, აგვისტოში, აღნიშნული თანამშრომლობის შედეგად ათასობით ადამიანის ევაკუაცია მოახდინეს.

მან, ასევე, თქვა, რომ ირაკლი ღარიბაშვილთან ერთად საქართველოს შიდა საკითხებზე ისაუბრეს. სტოლტენბერგმა აღნიშნა, რომ მნიშვნელოვანია სასამართლო სისტემის რეფორმის, მედიის თავისუფლებისა და ანგარიშვალდებულების მიმართულებით მუშაობა გაიზარდოს და ამ მიმართულებით პოლიტიკურმა განსხვავებამ და პოლარიზაციამ იკლოს. NATO ელის, რომ საქართველო დემოკრატიულ სტანდარტებს მიყვება და ბოლო წლებში განვითარებული მოვლენები კიდევ უფრო დაიხვეწება.