აშშ-ს ელჩი საქართველოში კელი დეგნანი პრეზიდენტ სალომე ზურაბიშვილის ინიციატივას მიესალმება. დეგნანის თქმით, პრეზიდენტმა ზურაბიშვილმა თავის არაჩვეულებრივ სიტყვაში პრეზიდენტ ბაიდენის მიერ ორგანიზებულ დემოკრატიის სამიტზე საქართველოში არსებული მდგომარეობა ძალიან ნათლად წარმოაჩინა.

"მან ისაუბრა ქვეყანაში არსებულ გამოწვევებზე და ასევე, შესაძლებლობებზე. მას ჰქონდა მოწოდებები ინკლუზიური მმართველობისთვის, დიალოგისთვის და პოლარიზაციის შემცირებისკენ და ჩვენ, რა თქმა უნდა, ყველა ამ ინიციატივას ვუჭერთ მხარს, იმიტომ, რომ ძალიან მნიშვნელოვანია დაიწყოს გამთლიანების პროცესი იმ დაპირისპირების შემცირებისკენ, რაც საზოგადოებაში არსებობს. პრეზიდენტის როლი, ამ შემთხვევაში როგორც გამაერთიანებლის განმტკიცებულია კონსტიტუციითაც", — განაცხადა ელჩმა.

გარდა ამისა, მან აღნიშნა, რომ ძალიან მნიშვნელოვანია ხალხის მიერ არჩეულმა ლიდერებმა ქართველი ხალხის ინტერესებისთვის პარლამენტში მუშაობა დაიწყონ.

"დღევანდელი პოლიტიკური სიტუაცია ნამდვილად აფერხებს საქართველოს პროგრესს და აქედან სარგებელს ნახულობს მხოლოდ რუსეთი. ასე რომ, ძალიან დიდი იმედი მაქვს ეს გამთლიანების პროცესი დაიწყება საქართველოში და ჩვენ მზად ვართ მხარი დავუჭიროთ ნებისმიერ ასეთ ინიციატივას", — თქვა დეგნანმა.

10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

გაიგე მეტი: