ცენტრ-პოინტის საქმეზე დაკავებულმა გუკა რჩეულიშვილმა სასჯელაღსრულების დაწესებულება ცოტა ხნის წინ დატოვა. იგი დღევანდელი სასამართლოს სხდომის შედეგად წინასწარი პატიმრობიდან 30 ათასი ლარის გირაოს სანაცვლოდ გათავისუფლდა. ციხიდან გამოსვლისას მან ჟურნალისტებს განუცხადა, რომ თავს უდანაშაულოდ თვლის:

"მე თავს უდანაშაულოდ ვთვლი და აქედან გამომდინარე სასჯელი მკაცრია. მე ახლა არ მაქვს იმის ფუფუნება, რომ ან ვინმეს დავეჯინო, ან რამე დავთმო. აუცილებლად ვიპოვი გამოსავალს, რაც მთავარია, ჩემთვის პრიორიტეტი დედაჩემია და მისი ციხიდან გამოსვლა, მაგრამ დაკავშირებული და გაიგივებული მაქვს ეს დაზარალებულების დაკმაყოფილებასთან, ამიტომ ამ ორივე პრობლემას ერთად მოვაგვარებთ".

დღევანდელი პროცესის შემდეგ სასამართლომ გუკა რჩეულიშვილს პასპორტი და პირადობის დამადასტურებელი მოწმობა ჩამოართვა, იმ მოტივით რომ მისი მიმალვის საფრთხე არსებობს. გუკა რჩეულიშვილი აღნიშნულს აბსურდს უწოდებს:

"როგორ შეიძლება დედაჩემი და დეიდაჩემი ციხეში ისხდნენ და მე სადმე მივიმალო".

დღეს, ექვს აპრილს, თბილისის საქალაქო სასამართლომ ე.წ. ბათუმის მაგნოლიის საქმეზე დიდი ოდენობით თანხების მითვისების ფაქტზე ბრალდებულ გუკა რჩეულიშვილს აღკვეთის ღონისძიების სახით შეფარდებული პატიმრობა გირაოთი შეუცვალა.

რჩეულიშვილს აღკვეთის ღონისძიების სახედ შეფარდებული პატიმრობის მაქსიმალური ცხრა თვიანი ვადა 12 აპრილს იწურებოდა. პროკურატურის განცხადებით, ამ ვადის ამოწურვამდე ვერ ხდებოდა საქმის არსებითი განხილვის დასრულება. სწორედ ამიტომ, ბრალდების მხარემ მიმართა სასამართლოს გუკა რჩეულიშვილისთვის აღკვეთის ღონისძიების შეცვლის თაობაზე.

თბილისის საქალაქო სასამართლოში გრძელდება მაია და გურამ რჩეულიშვილების ბრალდების საქმის არსებითი განხილვა.

გუკა რჩეულიშვილი სამართალდამცავებს 2016 წლის 13 ივლისს ჩაბარდა. პროკურატურამ მაგნოლიას ეპიზოდზე ცენტრ პოინტი აჭარა-ს თანამშრომლებს სალომე ჩარკვიანს და ირაკლი მინდელს, მაია რჩეულიშვილს და გუკა რჩეულიშვილს 11 ივლისს წაუყენა ბრალი.