იურიდიული კომიტეტის თვმჯდომარემ, ანრი ოხანაშვილმა TV პირველის დამფუძნებელი ვატო წერეთელი სხდომათა დარბაზიდან გააძევა. კომიტეტის სხდომაზე აზარტული თამაშების შესახებ ცვლილებებს განიხილავენ. ვატო წერეთელმა ანრი ოხანაშვილს ჯერ ჰკითხა, უთამაშია თუ არა აზარტული თამაშები, შემდეგ კი პრემიერმინისტრ ირაკლი ღარიბაშვილს "მავნე" უწოდა, რის შემდეგაც ოხანაშვილმა ის დარბაზიდან გააძევა.

"არასდროს? არც კრისტალზე, არც აჭარაბეთზე. რომელი გირჩევნიათ? არცერთი", — ეკითხებოდა წერეთელი.

ამაზე იურიდიული კომიტეტის თვმჯდომარემ მას შენიშვნა მისცა და ზრდილობისკენ მოუწოდა.

"ბატონო ვატო, თქვენ ხართ კომიტეტის სხდომაზე. ამიტომ მგონია, რომ წესები თქვენთვის ცნობილია. მოგიწოდებთ ზდრილობისკენ. დამშვიდდით, მარტო ეს არ იყო შეკითხვა, ამიტომ მე არ შევდივარ განხილვაში. შეკითხვა დაუსვათ მომხსენებელს", — უთხრა ოხანაშვილმა წერეთელს.

ამის შემდეგ TV პირველის დამფუძნებელმა თქვა:

"ეს რაღაცა დაჩქარებული წესით ესე უცებ შევუდგეთ და გადავწყვიტოთ, იმიტომ, რომ ირაკლი ღარიბაშვილმა, რომელსაც მე ვთვლი, რომ მავნე ადამიანია"...

ოხანაშვილმა წერეთელს სიტყვის დასრულების შესაძლებლობა არ მისცა და მიკროფონი გამოურთო.

"ბატონო ვატო, თქვენ ხართ უზრდელი ადამიანი, ამიტომ გაბრძანდეთ სხდომათა დარბაზიდან. როცა ზრდილობას ისწავლით, შემდეგ შეგიძლიათ, შემოხვიდეთ. მავნე ხართ თქვენ და უზრდელი. ამიტომ გაიარეთ ახლა და გადით აქედან", — უთხრა ოხანაშვილმა.

აზარტული თამაშების შესახებ კანონპროექტის თანახმად, იკრძალება სათამაშო ბიზნესის ყველანაირი რეკლამა. მათ შორის, სატელევიზიო, გარე და ქართულ ვებ-გვერდებზე განთავსებული რეკლამა. სათამაშო ბიზნესოპერატორებისთვის მხოლოდ სპონსორობის ხელშეკრულების გაფორმება იქნება დასაშვები.

გაიგე მეტი: