ცენტრ-პოინტის საქმეზე დაკავებული გუკა რჩეულიშვილი წინასწარი პატიმრობიდან გაათავისუფლეს. იგი საპატიმროს დღესვე დატოვებს. ამის შესახებ, გადაწყვეტილება მოსამართლემ რამდენიმე წუთის წინ გამოაცხადა.

გუკა რჩეულიშვილი ე.წ. ბათუმის მაგნოლიას ეპიზოდზე იყო ბრალდებული და მოსამართლის გადაწყვეტილებით, იგი 30 ათასი ლარიანი გირაოს სანაცვლოდ გათავისუფლდა.

მანამდე, გურამ რჩეულიშვილის 50 ათას ლარიანი გირაოს სანაცვლოდ გათავისუფლება პროკურატურამ ითხოვა. ასევე, პროკურორებმა გირაოსთან ერთად ბრალდებულისთვის საქართველოს პასპორტის ჩამორთმევაც ითხოვეს, რაც ასევე დაკმაყოფილდა და გურამ რჩეულიშვილს საქართველოს პასპორტი და პირადობის მოწმობა ჩამოართვეს.

გუკა რჩეულიშვილი სამართალდამცავებს 2016 წლის 13 ივლისს ჩაბარდა. პროკურატურამ მაგნოლიას ეპიზოდზე ცენტრ პოინტი აჭარა-ს თანამშრომლებს სალომე ჩარკვიანს და ირაკლი მინდელს, მაია რჩეულიშვილს და გუკა რჩეულიშვილს 11 ივლისს წაუყენა ბრალი.

პროკურატურის განცხადებით, ცენტრ პოინტმა მომხმარებლებისგან 64 219 606 ლარი მოიზიდა, თუმცა, თანხა არამიზნობრივად განკარგა, რითაც წლების განმავლობაში არაერთი ადამიანი დაზარალდა, რადგან კომპანიამ არ შეასრულა ნაკისრი ვალდებულებები.