საქართველოს სახალხო დამცველი, უჩა ნანუაშვილი ე.წ. მოსმენების კანონს საქართველოს საკონსტიტუციო სასამართლოში გაასაჩივრებს. ნანუაშვილმა თავისი უფლების გამოყენება, საკონსტიტუციო სასამართლოში გაასაჩივროს სადავო ნორმა, არასამთავრობო ორგანიზაციებთან შეხვედრის შემდეგ გადაწყვიტა.

ნანუაშვილს მიაჩნია, რომ საქართველოს პარლამენტის მიერ 2017 წლის 22 მარტს მიღებული საკანონმდებლო ცვლილებებით, ე.წ. ფარული მიყურადების ტექნიკური შესაძლებლობა კვლავ რჩება სახელმწიფო უსაფრთხოების სამსახურის ხელში და ეწინააღმდეგება საქართველოს საკონსტიტუციო სასამართლოს მიერ ამავე საქმეზე მიღებულ გადაწყვეტილებას.

საქართველოს პარლამენტმა ე.წ. მოსმენების კანონი, საქართველოს პრეზიდენტის ვეტოს მიუხედავად, მაინც მიიღო. ვეტოს დაძლევის შესახებ გადაწყვეტილებას მხარი დეპუტატების უმრავლესობამ დაუჭირა. კანონის მოქმედი რედაქციით, სახელმწიფო უსაფრთხოების სამსახურის მმართველობის სფეროში, იქმნება საჯარო სამართლის იურიდიული პირი - საქართვლოს ოპერატიულ-ტექნიკური სააგენტო.