იაშვილის სახელობის ბავშვთა ცენტრალური საავადმყოფოს სამედიცინო დირექტორის, ივანე ჩხაიძის განცხადებით, გამორიცხულია რომ ეროვნული გეგმით განსაზღვრული ვაქცინაციის 60%-იანი მაჩვენებელს წლის ბოლომდე მივაღწიოთ. ექიმი ვარაუდობს, რომ აცრების ამ ტემპის შენარჩუნების შემთვხვევაში ამ მაჩვენებელს მხოლოდ მომავალი წლის მაისში მივაღწევთ.

ჩხაიძის ინფორმაციით, რომ ბოლო ერთი თვის განმავლობაში ვაქცინაციის მაჩვენებელმა მკვეთრად მოიმატა და ყოველდღიური 2-3 ათასი აცრიდან 11-12 ათასამდე გაიზარდა, თუმცა ამბობს, რომ ეს არ არის საკმარისი

"თუ შევადარებთ 15 ნოემბრამდე პერიოდს, გასამმაგებული და გაოთხმაგებულია იმ ადამიანების რაოდენობა, რომელიც მიმართავენ ვაქცინაციის ცენტრებს. 15 ნოემბრამდე ეს 2-3 ათასი იყო, ახლა 11-12 ათასი ადამიანი მიდის სამუშაო დღეებში ვაქცინაციის ცენტრებში [...]

11 და 12 ათასი, რა თქმა უნდა, გაცილებით უფრო მეტია, ვიდრე 2-3, მაგრამ ეს არ არის ის ციფრი, რომელიც ქვეყანას სჭირდება. იმისათვის, რომ ჩვენ მოვახერხოთ უახლოესი თვეების განმავლობაში — აღარ არის საუბარი იმაზე, რომ დეკემბრის ბოლომდე ეროვნული გეგმის შესაბამისად მოსახლეობის 60%-ის ვაქცინაციას მოვახერხებთ, ეს უკვე გამორიცხულია, მაგრამ, მთავარია, რომ აი ამ ციფრების ასეთ დონეზე შენარჩუნების შემთხვევაში, თუ სტაბილურად ასეთი ციფრი იქნა დ ავერ გამოვნახეთ რესურსი რომ უფრო მეტად გაიზარდოს, ჩვენ სადღაც მაისისთვის მივაღწევთ, ალბათ, 60%-იან ზღურბლს", — განაცხადა ჩხაიძემ.

გარდა ამისა, ექიმი აღნიშნავს იმასაც, რომ მოსახლების 60%-ის აცრა საზოგადოებრივ იმუნიტეტს შექმნიდა კორონავირუსის თავდაპირველი ვარიანტის გავრცელების შემთხვევაში. ახლა, როცა ქვეყანაში მეტწილად ვირუსის ე.წ. დელტა ვარიანტი დომინირებს, პოპულაციური იმუნიტეტისთვის საჭიროა მოსახლეობის მინიმუმ 80%-ის აცრა.

"60% ზღურბლი, რომელიც, სრულებითაც არ გახლავთ მთავარი. 60%-იანი ზღურბლი სწორი იყო და ეს აქცენტი კეთდებოდა მაშინ, როდესაც უხანის ვირუსი იყო. დელტა ვარიანტმა, რომელიც ახლა დომინირებს ქვეყანაში, მკვეთრად შეცვალა პოპულაციური იმუნიტეტის ცნება და ამისათვის გვჭირდება მოსახლეობის 80%-ის ვაქცინაცია. ძალიან დიდი განსხვავებაა. ამიტომ, უახლოესი თვეების განმავლობაში პერსპექტივა იმისი, რომ ვაქცინაციით საქართველომ მოახერხოს პოპულაციური იმუნიტეტის შემქნა, სამწუხაროდ, არა გვაქვს", — განაცხადა ივანე ჩხაიძემ.

დაავადებათა კონტროლისა და საზოგადოებრივი ჯანმრთელობის ეროვნული ცენტრის ინფორმაციით, 8 დეკემბრის მონაცემებით, ორჯერადად აცრილია მოსახლეობის 36%, ბოლო 24 საათში კი ჩატარდა 11 943 აცრა.

გაიგე მეტი: