შინაგან საქმეთა სამინისტროში On.ge-ს უთხრეს, გორში, ძაღლის ცემით მოკვლასთან დაკავშირებით გამოძიება სისხლის სამართლის კოდექსის 259-ე მუხლის პირველი ნაწილითაა დაწყებული. აღნიშნული დანაშაული ისჯება ჯარიმით ან გამასწორებელი სამუშაოთი ვადით ერთ წლამდე.

გორში, სამხატვრო სკოლის მიმდებარე ტერიტორიაზე სასტიკად ნაცემი ძაღლი 3 მარტს იპოვეს. ინფორმაცია შემთხვევის შესახებ ფეისბუკით გავრცელდა.

ეს არ არის ცხოველების მიმართ სასტიკი და არაადამიანური მოპყრობის პირველი გამოვლენილი ფაქტი, რომელსაც ცხოველთა დამცველების მწვავე რეაქცია მოჰყვა.

აღნიშნული ფაქტის გამოძიების მოთხოვნით, რომელიც შეიცავს საქართველოს სისხლის სამართლის კოდექსის 259–ე მუხლით გათვალისწინებული დანაშაულის – ცხოველისადმი სასტიკი მოპყრობის ნიშნებს, დამნაშავე პირების უმკაცრესად დასჯის მიზნით შეიქმნა პეტიცია რომელსაც უკვე ასობით ხელმომწერი ჰყავს.

პეტიციის ავტორის ინფორმაციით, ნაცემი ძაღლი ტომარაში გაახვიეს და ერთ-ერთ სანაგვე ურნაში ჩააგდეს. ცხოველი პირველადი დახმარებისა და გადარჩენის მიზნით გადაიყვანეს თავშესაფარში, თუმცა მისი გადარჩენა ვეღარ მოხერხდა.