ნაციონალური მოძრაობის თავმჯდომარის, ნიკა მელიას განცხადებით, სახელმწიფო უსაფრთხოების სამსახურში გამოკითხვაზე მისვლას არ აპირებს. ამაზე მან მთავარი არხის ეთერში ისაუბრა.

"მოიტანენ ამ უწყებას თუ არ მოიტანენ, ერთი რამ მინდა იცოდნენ — მე, როგორც ნაციონალური მოძრაობის თავმჯდომარე, მე, როგორც საქართველოს მოქალაქე, ამ სისულელეში მონაწილეობას არ მივიღებ და თუკი რამე კითხვები აქვთ და კითხვებზე პასუხები სჭირდებათ, გამოვიდნენ და საჯაროდ ისაუბრონ, მეც საჯაროდ გავცემ პასუხს.

არ მივალ. ამ საქმის ფარგლებში, უბრალოდ, დიახაც, არ ვაპირებ თანამშრომლობას, არ ვაპირებ, იმიტომ, რომ სახელმწიფო გადატრიალებას ჩვენ გვედავებიან მე-5-ჯერ თუ მე-6-ჯერ", — განაცხადა მან.

დღეს მელიამ სახელმწიფო უსაფრთხოების სამსახურის გამომძიებლის შეტყობინება გაასაჯაროვა, სადაც აღნიშნულია, რომ საჯაროდ გაკეთებული კონკრეტული განცხადებების ირგვლივ მისი მოწმის სახით დაკითხვა გახდა საჭირო. მისი თქმით, აღნიშნულ გამომძიებელს წარმოებაში სახელმწიფო გადატრიალების საქმე აქვს.