თბილისის საკრებულოს პირველი სხდომა ერთიანი ნაციონალური მოძრაობის წევრებმა პროტესტის ნიშნად დატოვეს. ისინი სხდომაზე მივიდნენ მაისურებით, რომელზეც ნუგზარ ფუტკარაძის ფოტო იყო გამოსახული.

"ჩვენ ყველანი ვთვლით, რომ დღეს არ გვაქვს იმის მორალური უფლება, რომ დავესწროთ დღევანდელ სხდომას და შეგიქმნათ ე.წ. დემოკრატიის ფასადი, თითქოს არაფერი ხდება და ყველაფერი არის კარგად. აქედან გამომდინარე, ერთიანი ნაციონალური მოძრაობა დღევანდელ სხდომას ტოვებს", — განაცხადა სოფო ჯაფარიძემ სხდომის დატოვებამდე.

მისივე თქმით, არჩევნების შემდეგ კონკრეტული დეპუტატების მოსყიდვის მცდელობებმა იმსხვერპლა ბათუმის საკრებულოს წევრი, ნუგზარ ფუტკარაძე.

"ჩვენ ვუსმენდით ცესკოს წარმომადგენელს, რომელმაც დიდი სიამაყით და სიმშვიდით წარმოგვიდგინა არჩევნების შედეგები, თითქოს ასეთი საამაყო და სანიმუშო არჩევნები ჩაატარეს, სამწუხაროდ, რეალობა იყო სრულიად საპირისპირო და განსხვავებული. ჩვენ წინასაარჩევნოდ ვუყურებდით ყოველდღიურად მოსყიდვას, დაშინებას, ვუყურებდით იმ ძალადობას, რასაც ყველა ერთად ვხედავდით. ვუყურებდით როგორ იყენებდა ხელისუფლება, სამწუხაროდ, როგორც ადმინისტრაციულ, ისე ფინანსურ რესურსს მის საკეთილდღეოდ და უკვე არჩევნების დღეს ვუყურებდით კარუსელს, ვუყურებდით ფულის დარიგებას და ვუყურებდით, თუ როგორ ეხმარებოდნენ სუს-ის წარმომადგენლები და ასევე, კრიმინალები ქართულ ოცნებას.

აქედან გამომდინარე, ამ ყველაფრის მიუხედავად, ოპოზიციამ შეძლო და მოიგო გარკვეული და ცალკეული მუნიციპალიტეტები, მათ შორის, ბათუმის საკრებულო, როგორც ვთქვით, აქ დაიწყო უკვე შემდგომი ზეწოლა, ძალადობა, მოსყიდვის მცდელობები უკვე კონკრეტული დეპუტატების მიმართ, მათ შორის, კიდევ ერთხელ ვიტყვი, ჩვენი კოლეგის არაჩვეულებრივი ბატონი ნუგზარ ფუტკარაძის, რომლის სიცოცხლე, სამწუხაროდ, ამ ყველაფერს ემსხვერპლა, მისმა გულმა ამ ყველაფერს ვერ გაუძლო", — ამბობს ენმ-ის წევრი.

თბილისის საკრებულოს პირველ სხდომაზე 27 ხმით, ერთის წინააღმდეგ, დედაქალაქის წარმომადგენლობითი ორგანოს თავმჯდომარედ გიორგი ტყემალაძე აირჩიეს.

დღეს, 3 დეკემბერს ახალი მოწვევის საკრებულოები მუნიციპალიტეტებში პირველ სხდომებს მართავენ.

ბათუმის საკრებულოს მაჟორიტარი დეპუტატი ენმ-დან, ნუგზარ ფუტკარაძე 18 ნოემბერს გარდაიცვალა. 24 ნოემბერს პარტიამ სპეციალური ბრიფინგი გამართა და მის გარდაცვალებაში ქართული ოცნება დაადანაშაულა. კერძოდ, ენმ-ში აცხადებენ, რომ ფუტკარაძეზე აჭარის მთავრობის თავმჯდომარის, თორნიკე რიჟვაძის მამა, ძალოვანი უწყეის მოქმედი მაღალჩინოსანი, დავით რიჟვაძე ზეწოლას ახდენდა. აღსანიშნავია, რომ ენმ დავით რიჟვაძეს ოპოზიციონერი წევრების მუქარაში იქამდეც ადანაშაულებდა.

ენმ-მ ბრიფინგზე ჩანაწერები გაასაჯაროვა, რომელშიც, მათი თქმით, ფუტკარაძის, თაბაგიძისა და ბაკურიძის საუბარია ასახული. ჩანაწერები On.ge-ს პარტიიდან მიაწოდეს და მათში ისმის, რომ, სავარაუდოდ, ოპოზიციის წევრს ჩვენთვის უცხო პირები "ნეიტრალურობას" სთხოვენ — ის ამბობს, რომ ვერ გააკეთებს განცხადებას ნაციონალური მოძრაობის დატოვებაზე და სხვა ოპოზიციაში ვერ გადავა. პასუხად, კი იღებს, რომ სხვა ოპოზიციაში კი არა, "ნეიტრალურში გადავიდეს".

ნუგზარ ფუტკარაძის გარდაცვალების საქმეზე გამოძიება სისხლის სამართლის კოდექსის 116-ე მუხლის 1-ლი ნაწილით მიმდინარეობს, რაც გაუფრთხილებლობით სიცოცხლის მოსპობას გულისხმობს.