საკოორდინაციო საბჭოსთან არსებული ოპერაციული შტაბის უფროსის, გიორგი ღიბრაძის განცხადებით, კოვიდგადატანილებისთვის უვადო მწვანე სტატუსის გადაწყვეტილება გადაიხედება თუმცა აღნიშნავს, რომ იმაზე საუბარი, თუ როდის განიხილავენ საკითხს, ჯერჯერობით არ შეუძლია.

"ვინაიდან ეს კოვიდპასპორტი ჩვენ შემოვიღეთ ალტერნატივად იმისა, რომ სხვა უფრო მძიმე შეზღუდვები არ ყოფილიყო, ამიტომ, საწყის ეტაპზე, გათვალისწინებულია ის რეგულაციები, რომელიც არის მიღებული, მათ შორის, კოვიდგადატანილთათვის ე.წ ჩამკეტის მოხსნა, ამ ეტაპზე. ცხადია, აქ არის აზრთასხვადასხვაობა. ეს აზრთასხვადასხვაობა, ცხადია, იყო განხილული საბჭოზე, სადაც გადაწყვეტილება იქნა მიღებული თუმცა, საბოლოო ჯამში, როგორც უკვე აღინიშნა, ამ ეტაპზე არის მიღებული გადაწყვეტილება, რომ ვადა, ვისაც კოვიდი აქვს გადატანილი, იმათ არ დავუწესოთ. ცხადია, ეს შემდგომში იქნება განხილული და გადახედვის საგანი", — აცხადებს ის რუსთავი 2-ის ეთერში.

პირველი დეკემბრიდან ქვეყანაში ე.წ მწვანე პასპორტები ამოქმედდა. საკოორდინაციო საბჭოს მიერ მიღებული გადაწყვეტილებით, კორონავირუსის გადატანის შემდეგ ადამიანს მწვანე სტატუსი უვადოდ ენიჭება. გარდა ამისა, მწვანე სტატუსი აქვთ პირებს, ვინც:

  • ვაქცინირებულია სრულად;
  • ჩატარებული აქვს 72-საათიანი ვალიდურობის PCR ტესტი;
  • ჩატარებული აქვს 24-საათიანი ვალიდურობის ანტიგენ ტესტი;

25 ნოემბერს დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ განაცხადა, რომ გადაწყვეტილება, რომლის თანახმადაც, მწვანე სტატუსი კოვიდგადატანილისთვის უვადოა, შესაცვლელია.

გადაწყვეტილებას არც იაშვილის სახელობის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე ეთანხმება და აცხადებს, რომ უვადო მწვანე სტატუსზე საუბარი წარმოუდგენელია, რადგან კორონავირუსი არ არის წითელა, რომელსაც გადაიტან და მისგან მთელი ცხოვრება თავისუფალი იქნები.

ამავე თემაზე: