რიდლი სკოტის ახალი კინოსურათი House of Gucci (გუჩის სახლი) წლის ერთ-ერთი ყველაზე მაღალი მოლოდინების მქონე ფილმია, რომელსაც მასში აღწერილი ისტორიის რეალური პროტოტიპები არც ისე კეთილგანწყობით შეხვდნენ.

გუჩის ყოფილი ხელმძღვანელის ალდო გუჩის მემკვიდრეებმა საჯარო განცხადება გაავრცელეს, სადაც აღნიშნავენ, რომ "შეცბუნებულები" არიან ფილმში მათი ოჯახის "არასწორად" წარმოჩენის გამო.

"ფილმის შემქმნელებმა კონსულტაციაც კი არ გაიარეს ალდო გუჩის შთამომავლებთან და გუჩის ოჯახის წევრები ავაზაკებად, უვიცებად და უგულოებად წარმოაჩინეს", — ვკითხულობთ განცხადებაში.

მათ ხაზი გაუსვეს ასევე ლედი გაგას პერსონაჟის, პატრიცია რეჯიანის რეპრეზენტაციას ფილმში და აღნიშნეს, რომ ის მსხვერპლადაა წარმოჩენილი, როცა, რეალურად, მძიმე კრიმინალური დანაშაული ჩაიდინა.

"ეს ყველაფერი უბრალოდ სიმართლესთან ახლოსაც კი არაა".

ფილმში ლედი გაგა პატრიცია რეჯიანის, ალ პაჩინო კი ალდო გუჩის განასახიერებს.

ფოტო: Getty

გუჩის ოჯახის საყვედურებს არ იზიარებს რეჟისორი რიდლი სკოტი და ამბობს, მათი წყენა იმან გამოიწვია, რომ "ალ პაჩინო ფიზიკურად არ ჰგავს ალდო გუჩის".

"როგორ შეიძლება ვინმეს ალ პაჩინოზე უკეთ ითამაშა? უკაცრავად, მაგრამ, ალბათ, სამყაროში საუკეთესო მსახიობები იღებენ ამ ფილმში მონაწილეობას და ამის გამო მადლიერები უნდა იყვნენ", — თქვა რიდლი სკოტმა.

როგორც ჩანს, გუჩის სახლის ირგვლივ იმაზე მეტი დრამა განვითარდება, ვიდრე მხოლოდ ფილმის სიუჟეტისგან ველოდით.

ასევე იხილეთ: