ახალი წლის დადგომამდე დროის ათვლა უკვე დაიწყო. მხიარულებასა და დიდებულებასთან ერთად, ამ პერიოდს სევდა და მელანქოლიაც ახლავს თან, რადგან სამწუხაროდ, ახალი წელი ყველასთვის ჯადოსნური ნამდვილად არ არის. ჩვენ გარშემო უამრავი სოციალური პრობლემაა, რომლებზეც ზრუნვა თითოეული ჩვენგანის პასუხისმგებლობაა.

სწორედ ამ საზოგადო პრობლემებსა და ზრუნვის მნიშვნელობაზე შეიქმნა თეგეტას ახალი, მასშტაბური საახალწლო კამპანია, რომელიც მიზნად ისახავს, სასიკეთო ცვლილებების მისაღწევად რაც შეიძლება მეტი ადამიანი გააერთიანოს.

კამპანიის ფარგლებში შეიქმნა პლატფორმა tegeta.care, რომელიც აერთიანებს იმ ორგანიზაციებსა თუ პროექტებს, რომლებიც მწვავე პრობლემების მოგვარებაზე ზრუნავენ. პლატფორმის მეშვეობით, თეგეტა ნებისმიერ მსურველს აძლევს შესაძლებლობას, მისთვის მნიშვნელოვანი პრობლემის მოგვარებაზე იზრუნოს. პლატფორმაზე ორგანიზაციების სია დროთა განმავლობაში მუდმივად განახლდება.

"ადამიანების უმრავლესობას აქვს სურვილი, რაიმე მნიშვნელოვანი სასიკეთო ცვლილების თანამონაწილე გახდეს. ამისათვის გმირობა სულაც არაა საჭირო. თითოეულ ჩვენგანს ყოველდღიურად აქვს შანსი, ერთი მზრუნველი ქმედებით დიდი სასიკეთო ცვლილება გამოიწვიოს. სწორედ ამაშია ზრუნვის უდიდესი ძალა — ზრუნვა მართლაც ცვლის სამყაროს. სწორედ ამ დაკვირვებაზე ავაგეთ წინასაახალწლო კამპანია.

გვჯერა, რომ საზოგადოებისთვის აქტუალური თემების მხარდაჭერა თეგეტას მსგავსი დიდი კომპანიების პასუხისმგებლობაა. სწორედ ამიტომ ჩვენი კამპანია არა მხოლოდ შემოქმედებით კომუნიკაციას, არამედ რეალურ ქმედებებს მოიცავს. ერთი მხრივ, ვახორციელებთ ცნობიერების ასამაღლებელ კამპანიებს, ხოლო მეორე მხრივ, ვდგამთ რეალურ ნაბიჯებს პრობლემების მოსაგვარებლად", — ამბობს თეგეტას მარკეტინგის დირექტორი მარიამ კარკალაია.

"რომ დასვათ კითხვა, რას საქმიანობს თეგეტა? ჩვენი პასუხი იქნებოდა: თეგეტა ზრუნავს. ზრუნავს, რომ მომხმარებელს ავტომობილის ფლობის გამოცდილება გაუმარტივოს. ზრუნავს, რომ ბიზნესი განვითარდეს. ზრუნავს, რომ განათლების დონე ამაღლდეს, ადამიანებმა უფრო თანასწორუფლებიან გარემოში იცხოვრონ, ცხოველებმა კი — უფრო უსაფრთხოში. ზუსტად ამიტომ ვეხმარებით სხვადასხვა ორგანიზაციას და ამიტომ შევქმენით პლატფორმა — Tegeta Care. ამით, ზრუნვის მსურველ ადამიანებს ვაძლევთ შესაძლებლობას, შემოგვიერთდნენ, მარტივად გააკეთონ დონაცია და ერთად უზრუნველვყოთ სასიკეთო ცვლილებები. ამავდროულად, www.tegeta.care ერთგვარი მედიაპლატფორმაა საქველმოქმედო ორგანიზაციებისთვის — ემსახურება მათ შესახებ ცნობადობის გაზრდას და მუდმივად გაუწევს საინფორმაციო მხარდაჭერას", — ამბობს თეგეტას სტრატეგიული კომუნიკაციების ხელმძღვანელი ნათიკა ბერძული.

ადამიანებისთვის ზრუნვის საჭიროების შესახსენებლად, თეგეტას კამპანიის ფარგლებში ვიდეოც შეიქმნა, რომელიც აჩვენებს, რომ გარშემო უამრავი რამაა, რისი შეცვლაც ჩვენს ხელშია.

ვიდეოს საუნდტრეკი აგებულია ვაჟა-ფშაველას ცნობილ ლექსზე რამ შემქმნა ადამიანად. მუსიკალური კომპოზიცია და ვოკალური შესრულება კი Sophie Villy-ის ეკუთვნის.

"ჩვენ მიერ შექმნილი ვიდეო ყველასთვის ნაცნობ, ახლობელ და აქტუალურ პრობლემებს ეხება. ვიდეოში სხვადასხვა პერსონაჟის რამდენიმე სიუჟეტი ვითარდება. თითოეულ მათგანს თავისი უნიკალური ისტორია და ახალი წელი აქვს. ვიდეოს პოზიტიური დასასრულით კი ჩვენი მთავარი სათქმელი ისაა, რომ ზრუნვა ცვლის სამყაროს. ჩვენ კი, ყველამ ერთად, უნდა ვიზრუნოთ, რომ ეს წელი ყველასთვის ჯადოსნური იყოს", ამბობს კამპანიის კრეატიული დირექტორი პავლე გაბრიჭიძე.