დღეიდან, პირველი დეკემბრიდან გაზის ტარიფი ზოგიერთ ქალაქსა და დასახლებაში იზრდება. სემეკმა მიერ ბუნებრივი გაზის ტარიფების შესახებ დადგენილებაში შეტანილი ცვლილება სწორედ დღეიდან ამოქმედდება.

უფრო კონკრეტულად, ტარიფის ცვლილება დღეიდან, პირველი დეკემბრიდან შემდეგი კომპანიების მომხმარებლებს შეეხებათ:

  • შპს "დიდი დიღომი" — ტარიფი იზრდება 1 თეთრით კუბურ მეტრზე და გახდება 57 თეთრი (დღგ-ს ჩათვლით). კომპანია დიდი დიღმის მოსახლეობას ემსახურება;
  • შპს "ყამარი მ" — ტარიფი იზრდება 1 თეთრით კუბურ მეტრზე და გახდება 51 თეთრი (დღგ-ს ჩათვლით). კომპანია მუხიანის აგარაკებს ემსახურება;

გარდა ამისა, 2022 წლის პირველი იანვრიდან გაზის ტარიფი ძვირდება შემდეგი კომპანიების აბონენტებისთვის:

  • სს "საჩხერეგაზი" — ტარიფი იზრდება 0,635 თეთრით კუბურ მეტრზე და გახდება 55,276 თეთრი (დღგ-ს ჩათვლით). კომპანია საჩხერის მუნიციპალიტეტს ემსახურება;
  • შპს "თელავგაზი" — ტარიფი იზრდება 1 თეთრით კუბურ მეტრზე და გახდება 58,864 თეთრი (დღგ-ს ჩათვლით). კომპანია თელავის მოსახლეობას ემსახურება;
  • შპს "დი-ვი-ეს" — ტარიფი იზრდება 0,5 თეთრით კუბურ მეტრზე და გახდება 51,789 თეთრი (დღგ-ის ჩათვლით). კომპანია გარდაბნის მუნიციპალიტეტის ნაწილის მოსახლეობას ემსახურება.

სემეკის მიერ დადგენილი ტარიფების ვადა 2023 წლის 1 იანვრამდე განისაზღვრა.

დღეიდან გაზის ტარიფი რეგიონებში არასაყოფაცხოვრებო მომხმარებლებისთვისაც იზრდება. ბიზნეს-სუბიექტებისთვის ბუნებრივი აირის ტარიფი 1,15 ლარი იქნება.

სოკარ ჯორჯია გაზი ტარიფს 20 თეთრით, ხოლო შპს ინტერ გაზი 6 თეთრით აძვირებს.

სოკარ ჯორჯია გაზი რეგიონებსა და თბილისში, ჰუალინგის დასახლებაში არსებულ აბონენტებს ემსახურება. კომპანიაში ტარიფის ზრდის მიზეზად მომსახურებასთან დაკავშირებული დანახარჯების გაზრდასა და ლარის კურსის ცვლილებას ასახელებენ. შპს ინტერ გაზი კი, ბუნებრივ აირს ახალციხესა და ასპინძას აწვდის.

სოკარ ჯორჯია გაზში განმარტავენ, რომ ტარიფი პურის მწარმოებელი კომპანიებისთვის უცვლელი დარჩება.