მიხეილ სააკაშვილის ადვოკატის, ბექა ბასილაიას განცხადებით, ექსპრეზიდენტის ჯანრთელობის მდგომარეობა მისი სასამართლოში გადაყვანისთვის დამაბრკოლებელი არ იქნება. ამის შესახებ მან TV პირველის ეთერში ისაუბრა.

"მან შეძლო ჩვენთან შეხვედრა, ჩვენთან კომუნიკაცია, ის თავისი ფეხით გადაადგილდება, აქედან გამომდინარე, ჯანმრთელობის მდგომარეობა არ იქნება დამაბრკოლებელი სასამართლოში მონაწილეობის მისაღებად", — აღნიშნა ადვოკატმა.

მას შემდეგ, რაც სააკაშვილმა მხარდამჭერებს 29 ნოემბერს, თავისი სასამართლო პროცესის პარალელურად, საქალაქო სასამართლოს ეზოში შეკრებისკენ მოუწოდა, მისი ადვოკატები ხელისუფლებას მიმართავენ და აცხადებენ, რომ აქცია ექსპრეზიდენტის პროცესზე მიყვანაზე უარის თქმის საფუძველი არ უნდა გახდეს.

29 ნოემბერს სააკაშვილის მორიგი სასამართლო სხდომა გაიმართება, თუმცა უცნობია, დაესწრება თუ არა ის საკუთარ პროცესს. 22 ნოემბერს იუსტიციის მინისტრმა განაცხადა, რომ ვინაიდან ექსპრეზიდენტმა შიმშილობა შეწყვიტა, გამოირიცხა ერთი ფაქტორი, რომლის გამოც ის სასამართლოში არ მიჰყავდათ. მისივე თქმით, ექიმების შესაბამისი დასკვნის შემთხვევაში, შესაძლოა, შემდგომ სასამართლო პროცესზე დარბაზში მიიყვანონ.

ბრეგაძის მტკიცებით, სხდომაზე არ მიყვანას 2 მთავარი ფაქტორი ჰქონდა: უსაფრთხოება და სააკაშვილის ჯანმრთელობის მდგომარეობის მკვეთრად გაუარესების რისკი. ის ვრცლად საუბრობს მეორეზე, თუმცა დეტალურად არ განიხილავს პირველს — უსაფრთხოებას. შესაბამისად, უცნობია, რას იტყვის სამინისტრო სააკაშვილის უსაფრთხოებაზე 29 ნოემბერს.