დღეს ქართული ოცნების ცენტრალურ ოფისთან აქცია გაიმართა, ადგილზე მობლიზებული იყო პოლიციაც. აქტივისტებს მიტანილი ჰქონდათ რუსული რუბლი, რომელზეც გამოსახული იყო მმართველი პარტიის დამფუძნებელი, ბიძინა ივანიშვილი, ასევე, ბანერები წარწერებით — "სახელმწიფოს მტაცებელი მკვლელი ოცნება", "სისტემა კლავს". ისინი ბათუმის საკრებულოს წევრის, ნუგზარ ფუტკარაძის გარდაცვალებასთან დაკავშირებულ მოვლენებს აპროტესტებენ.

ფოტო: შეცვალე/Facebook

მოძრაობა შეცვალეს აქტივისტს, ნიკა ფარულავას პარტიის ოფისთან მიტანილი ჰქონდა ქართული ოცნების მაისური, რომელიც სიმბოლურად წითელ საღებავით იყო დასვრილი. მისი თქმით, ეს მაისური რეჟიმის განსახიერებაა.

"ეს არის რეჟიმის განსახიერება უკვე ქართული ოცნების პარტიის ლოგო და ჩვენ ვიცით რამდენი ადამიანი იმსხვერპლა ქართულმა ოცნებამ საკუთარი ვიწროპოლიტიკური ინტერესების გამო. დაწყებული, მათ შორის, ლექსო ლაშქარავა, ია კერზაია, ნუგზარ ფუტკარაძე და ნებისმიერი ჩვენგანი შეიძლება აღმოჩნდეს მათი მსხვერპლი მხოლოდ იმისთვის, რომ მათ ჰქონდეთ კომფორტის ზონა და შეინარჩუნონ ძალაუფლება", — ამბობს ფარულავა.

ნუგზარ ფუტკარაძე ნაციონალური მოძრაობიდან ახალი მოწვევის საკრებულოს წევრი იყო. ის 18 ნოემბერს გარდაიცვალა. 2021 წლის ადგილობრივი თვითმმართველობის არჩევნებში ქართულმა ოცნებამ უმრავლესობის მოპოვება ვერ შეძლო და მას მხოლოდ 16 დეპუტატი ჰყავდა, ოპოზიციას კი, გიორგი გახარიას პარტიის ჩათვლით, ჯამში 19.

ფუტკარაძის გარდაცვალების საქმეზე 18 ნოემბერს გამოძიება დაიწყო. შსს-ს ცნობით, გამოძიება სისხლის სამართლის კოდექსის 116-ე მუხლის 1-ლი ნაწილით მიმდინარეობს, რაც გაუფრთხილებლობით სიცოცხლის მოსპობას გულისხმობს.

ნაციონალური მოძრაობა აჭარის მთავრობის თავმჯდომარის მამას და შსს-ს მაღალჩინოსანს, დავით რიჟვაძეს საკრებულოს გარდაცვლილ წევრზე, ნუგზარ ფუტკარაძეზე ზეწოლაში ადანაშაულებს. პარტიის წევრის, გიორგი კირთაძის განცხადებით, დავით რიჟვაძის დავალებით ფუტკარაძეზე ზეწოლას ყოფილი ძალოვნები ახდენდნენ.

აღნიშნულთან დაკავშირებით, ენმ-მ ბრიფინგის ჩანაწერი გაასაჯაროვა. პარტიის ცნობით, აუდიოში ორი ყოფილი მაღალჩინოსნის, ვაჟა თაბაგიძისა და ბადრი ბაკურიძის, ასევე, ნუგზარ ფუტკარაძის საუბარია ასახული. ჩანაწერებში, რომელიც On.ge-ს პარტიიდან მიაწოდეს, ისმის, რომ, სავარაუდოდ, ოპოზიციის წევრს ჩვენთვის უცხო პირები "ნეიტრალურობას" სთხოვენ — ის ამბობს, რომ ვერ გააკეთებს განცხადებას ნაციონალური მოძრაობის დატოვებაზე და სხვა ოპოზიციაში ვერ გადავა. პასუხად, კი იღებს, რომ სხვა ოპოზიციაში კი არა, "ნეიტრალურში გადავიდეს".