საპარლამენტო უმრავლესობის ერთ-ერთი ლიდერის, ირაკლი ქადაგიშვილის შეფასებით, მიხეილ სააკაშვილის მოთხოვნა, მისცენ დეპუტატებს გორის ჰოსპიტალში მისი მონახულების საშუალება, წინააღმდეგ შემთხვევაში კი მკურნალობის შეწყვეტის დაანონსება, სახელმწფოს შანტაჟია. ის ამბობს, რომ ყველაფერი უნდა განისაზღვროს კანონის შესაბამისად.

"ეს არის ჩვეულებრივი შანტაჟი სახელმწიფოსი, კანონის და კანონიერების. გამომდინარე აქედან, ალბათ, ყველაზე კარგი და ერთადერთი პოზიცია და ქმედება, რაც უნდა განხორციელდეს, არის, რომ ეკუთვნის მას რამე-არ ეკუთვნის მას რამე, ცოდოა-არ არის ცოდო, უნდა შეხვდეს ვინმე თუ არ უნდა შეხვდეს, უნდა განისაზღვროს კანონიდან გამომდინარე", — განაცხადა ირაკლი ქადაგიშვილმა.

სააკაშვილის ადვოკატმა, ბექა ბასილაიამ განცხადა, რომ დეპუტატებს ექსპრეზიდენტთან შესვლის შესაძლებლობას არ აძლევენ. ადვოკატის შეფასებით, ამის სამართლებრივი წინაპირობაც არ არსებობს. მან თქვა, რომ თუ ასე გაგრძელდა, მიხეილ სააკაშვილი მკურნალობის პროცესზე უარს იტყვის.

ექსპრეზიდენტის პირადი ექიმის, ნიკოლოზ ყიფშიძის შეფასებით, ექსპრეზიდენტის მიერ მკურნალობის შეწყვეტა კატასტროფა იქნება. ის განმარტავს, რომ ასეთ შემთხვევაში მთელი მკურნალობის პროცესის თავიდან დაწყება გახდება საჭირო.