ადამიანის უფლებათა კომიტეტის თავმჯდომარის მოადგილე, ალუდა ღუდუშაური ოპოზიციის მხრიდან ნუგზარ ფუტკარაძის გარდაცვალების ფაქტის გამოძების მოთხოვნას მანიპულაციას უწოდებს. ის დაინტერესდა, თუ ჰქონდა ნაციონალურ მოძრაობას რაიმე მტკიცებულება, რატომ "ელოდებოდნენ" ფუტკარაძის გარდაცვალებას და რატომ მიაწოდეს იქამდე სამართალდამცავ უწყებებს.

"თუ მათ მართლაც რაიმე [მტკიცებულება] აქვთ, აქედან გამომდინარე, რას ელოდებოდნენ ამ ბატონის გარდაცვალებას, მანამდე რატომ არ წარადგინეს, რატომ არ ითანამშრომლეს შესაბამის უწყებებთან? ძალიან უხერხულია.

გარდაცვლილი ადამიანით როდესაც მანიპულირებ, ჩემთვის, როგორც პოლიტიკოსისთვის და იმ ადამიანების მხრიდანაც, რომლებიც ამას აკეთებენ და თავს პოლიტიკოსებს უწოდებენ, მე ვფიქრობ, რომ ამორალური და სამარცხვინოა", — განაცხადა ღუდუშაურმა.

ნაციონალური მოძრაობა აჭარის მთავრობის თავმჯდომარის მამას და შსს-ს მაღალჩინოსანს, დავით რიჟვაძეს საკრებულოს გარდაცვლილ წევრზე, ნუგზარ ფუტკარაძეზე ზეწოლაში ადანაშაულებს. პარტიის წევრის, გიორგი კირთაძის განცხადებით, დავით რიჟვაძის დავალებით ფუტკარაძეზე ზეწოლას ყოფილი ძალოვნები ახდენდნენ.

ენმ-მ ჩანაწერები გაასაჯაროა, რომელშიც, მათი თქმით, ფუტკარაძის, თაბაგიძისა და ბაკურიძის საუბარია ასახული. ჩანაწერები On.ge-ს პარტიიდან მიაწოდეს და მათში ისმის, რომ, სავარაუდოდ, ოპოზიციის წევრს ჩვენთვის უცხო პირები "ნეიტრალურობას" სთხოვენ — ის ამბობს, რომ ვერ გააკეთებს განცხადებას ნაციონალური მოძრაობის დატოვებაზე და სხვა ოპოზიციაში ვერ გადავა. პასუხად, კი იღებს, რომ სხვა ოპოზიციაში კი არა, "ნეიტრალურში გადავიდეს".

ფუტკარაძის გარდაცვალების საქმეზე გამოძიება სისხლის სამართლის კოდექსის 116-ე მუხლის 1-ლი ნაწილით მიმდინარეობს, რაც გაუფრთხილებლობით სიცოცხლის მოსპობას გულისხმობს.