ნაციონალური მოძრაობის წევრის, გიორგი კირთაძის განცხადებით, ხვალ ბათუმში ძველი მოწვევის საკრებულოს ბიუჯეტის საკითხის გატანაში ხელს შეუშლიან, მათ შორის, გეგმავენ, რომ დარბაზში შევიდნენ.

"არც სამართლიანობის და არც კანონიერებაში არ ჯდება ეს, როცა ქალაქმა აირჩია საკრებულოს ის შემადგენლობა, რაც აირჩია და უცებ აქ რიჟვაძეებმა გადაგვიწყვიტონ, ესენი არაფერ შუაშია [...] ძველი მოწვევის საკრებულომ, რომელსაც ვადა გაუვიდა, უნდა მიაღებინოს მომდევნო წლის ბიუჯეტი, ანუ როგორ იცხოვრებს ქალაქი, ეს გადააწყვეტინოს. ყველაფერს, მათ შორის, ფიზიკურადაც ვაპირებთ, რომ შევიდეთ დარბაზში და ხელი შევუშალოთ ამ გადწყვეტილების მიღებას", — ამბობს კირთაძე.

კირთაძემ ასევე აღნიშნა, რომ საკრებულოში უმრავლესობის მოპოვება ქართული ოცნებისთვის სასიცოცხლოდ მნიშვნელოვანია და მისი თქმით, სწორედ ამის გამო "იყო გამოცხადებული ნადირობა ნაციონალური მოძრაობის საკრებულოს წევრებზე".

ენმ-ს წევრი მირდატ ქამადაძე განმარტავს, რომ თუ საკრებულომ ბიუჯეტი ვერ დაამტკიცა, რიგგარეშე არჩევნების საჭიროება დადგება. მისი შეფასებით, სწორედ ამიტომ ცდილობს ხელისუფლება, ხვალინდელ ბიუროს სხდომაზე განიხილონ საკითხი და ზეგ ძველმა საკრებულომ დაამტკიცოს ბიუჯეტი.

"ცხადია, რატომაც აკეთებს ამას ქართული ოცნება. მას ეშინია ოპოზიციური საკრებულოსი, რადგან თუ ოპოზიციური საკრებულო არ დაუმტკიცებს ბიუჯეტს, მას უწევს როგორც მერის, ასევე საკრებულოს რიგგარეშე არჩევნების ჩატარება. მან იცის, რა ფასად დაუჯდა ეს ე.წ. მოგება. შესაბამისად, ამას არიდებს თავს და ცდილობს, რომ ზეგინდელ საკრებულოს სხდომაში, ხვალ ბიუროზე დაამატოს ბიუჯეტის გატანის საკითხი", — აღნიშნა მან.

მისივე თქმით, როცა ქვეყანაში არ არსებობს ინსტიტუციები, სადაც, შეიძლება, ამ უსამართლობაზე იჩივლონ, უწევთ ყველა "ლეგიტიმური, ბუნებრივია, არაძალადობრივი" გზის გამოყენება, რომ ეს არ მოხდეს.