ქართული ოცნების დეპუტატის, გია ვოლსკის განცხადებით, რაც უფრო არარეალურია "ნაცრევოლუციის თემა", სახალხო დამცველი, ნინო ლომჯარია უფრო "კაპასი ხდება". მმართველი გუნდის წევრი ომბუდსმენის განცხადებას მათივე პარტიის თავმჯდომარე, ირაკლი კობახიძეზე "სულელურს" და "ღლიცინს" უწოდებს.

"შეუსაბამოა მისი განცხადებები იმ სტატუსთან დაკავშირებით, რომელიც პარლამენტმა ირაკლი კობახიძეს თავმჯდომარეობით მისცა. ის დებულება, რაც დამტკიცდა, ის ფიცი, რაც დადო, აბსოლუტურად შეუსაბამოა იმ სარკაზმთან, ღლიცინთან, რაღაც სულელურ განცხადებებთან, რომელიც უკავშირდება გამარჯვებული პარტიის თავმჯდომარის ლეგიტიმაციას [...] იმ რაღაც გარკვეულ ჯგუფში ღლიცინში იღებ მონაწილეობას და ალაიკებ ირაკლის მიმართ უშნო, სარკასტულ გამონათქვამებს და უკბილო ხუმრობებს", — აცხადებს ვოლსკი.

ომბუდსმენმა, ნინო ლომჯარიამ 23 ნოემბერს განაცხადა, რომ მმართველი გუნდის ლიდერები, პირველ რიგში, კი მისი თავმჯდომარე, ირაკლი კობახიძე სერიოზულ პოლიტიკურ ფიგურად არ მიაჩნია. ლომჯარიას თქმით, მას არცერთ საერთაშორისო ორგანიზაციასთან თუ ქვეყანასთან ლეგიტიმაცია არ აქვს.

ქართული ოცნების წევრები სახალხო დამცველს, ნინო ლომჯარიას ხშირად ადანაშაულებენ პარტიულობასა და მიკერძოებულობაში მათდამი კრიტიკული განცხადებების გამო. ამ მხრივ გამოირჩევა პარტიის თავმჯდომარე ირაკლი კობახიძე. 25 ოქტომბერს მან განაცხადა, რომ ნინო ლომჯარია ნაციონალური მოძრაობის "ერთ-ერთ რიგით აქტივისტად აქციეს". ამასთანავე, კობახიძე პოლიტიკურად მიკერძოებულს უწოდებს ომბუდსმენის მიერ შექმნილი ექიმთა ჯგუფის წევრებსაც.

17 ნოემბერს სახალხო დამცველის მიერ შექმნილმა ექიმების ჯგუფმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. ამ დასკვნის შემდეგ ქართული ოცნების დეპუტატები სახალხო დამცველს კიდევ უფრო მეტად აკრიტიკებენ. ირაკლი კობახიძემ დასკვნას "ფეიკი" უწოდა და ლომჯარიას შესაძლო პასუხისმგებლობაზე ისაუბრა.

ბექა დავითულიანის აზრით, ნინო ლომჯარია პოლიტიკურ პროცესში "ცოტა სხვა მხარეს" არის გადახრილი. სოზარ სუბარის განცხადებით, კი გაოცებულია იმ ფაქტით, რომ ლომჯარიამ პატიმრობაში მყოფი მესამე პრეზიდენტი იმაზე მეტჯერ ინახულა, ვიდრე ყველა სხვა პატიმარი ოთხი წლის განმავლობაში.

მმართველი პარტიის ლიდერების განცხადებებს თავად ნინო ლომჯარიას გამოეხმაურა და განაცხადა, რომ "კანონის წაკითხვაც არ იციან". გარდა ამის, ლომჯარიას შეფასებით, მმართველი პარტიის ლიდერების განცხადებები მისი მისამართით არა კრიტიკა, არამედ პოლიტიკური მუქარაა.