პრემიერმინისტრის, ირაკლი ღარიბაშვილის განცხადებით, ქვეყნის 300 000 შრომისუნარიანი მოქალაქე სოციალური დახმარების მძევალია. მისი თქმით, ისინი დახმარების მოხსნას ტრაგედიად აღიქვამენ და ქვეყნის განვითარებაში მონაწილეობას სრულიად არ იღებენ.

"ისინი ყოველ თვე იღებენ სოციალურ დახმარებას და ვთქვათ პირდაპირ, ეს ადამიანები გავხადეთ ამ დახმარების მძევლები. ადამიანს აქვს შიშის განცდა, რომ თუ ის თუნდაც ელემენტარულად გაიუმჯობესებს საყოფაცხოვრებო პირობებს — შეიძენს ტელევიზორს, მაცივარს და ა.შ. მას აქვს შიში, რომ სოციალური აგენტი დააკლებს ქულას, ან მოუხსნის დახმარებას. რაც მისთვის აღიქმება ტრაგედიად, იმიტომ, რომ ამის იქით ვეღარ ხედავს", — აცხადებს ის.

ღარიბაშვილის ამბობს, რომ ამ პრობლემის მოსაგვარებლად ადამიანები მუშაობას უნდა მიაჩვინო და შრომის კულტურა განავითარონ.

ღარიბაშვილმა სოციალური დახმარებების შესახებ ბოლო დღეებში არაერთხელ ისაუბრა. 22 ნოემბერს მან თქვა, რომ არსებული სოციალური პოლიტიკის ფარგლებში მოქალაქეები "უმუშევრობას, უმოქმედობას და სიღარიბეს" შეაჩვიეს. ამავე დღეს მან განაცხადა, სოციალური დახმარების ნაცვლად, შრომისუნარიან მოქალაქეებს სამუშაო ადგილები უნდა შესთავაზონ.