მიხეილ სააკაშვილის პირადი ექიმის, ნიკოლოზ ყიფშიძის განცხადებით მის მიერ ექსპრეზიდენტის თავისუფალ გარემოში მკურნალობის შესახებ გამოთქმული იდეა კატეგორიული არაა, თუმცა მზადაა, ამ საკითხზე ესაუბროს ყველას. ის ამბობს, რომ საჭიროების შემთხვევაში, საკითხის გადასაწყვეტად, შესაძლოა, უცხოელი სპეციალისტები მოიწვიონ.

"მე ვუპასუხებ, რომ ძალიან კარგი. ყველას უნდა ჰქონდეს თავისი აზრი, თვითონ უნდა გამოხატონ. მზად ვარ, ველაპარაკო ყველას. მე კატეგორიულად არ მითქვამს ეს ამბავი, მაგრამ, მე ყოველ ჩემს სიტყვას ხელს მოვაწერ თავიდან. თუ საჭიროება მოითხოვს, შეიძლება დავუძახოთ სპეციალისტებს საზღვარგარეთიდან. იმათ ნახონ და გამოიტანონ დასკვნა, რა უფრო სწორია — ჩემი მიდგომა თუ სხვისი მიდგომა.

გუშინ, 20 ნოემბერს, სააკაშვილის გორის სამხედრო ჰოსპიტალში მონახულების შემდეგ, ყიფშიძე ექსპრეზიდენტის თავისუფალ გარემოში მკურნალობის ინიციატივით გამოვიდა. მან აღნიშნა, რომ ეს საკითხი თავად სააკაშვილთან არ შეუთანხმებია.

"თავისუფლად მკურნალობის შესაძლებლობა ნიშნავს მკურნალობას არა ციხეებში, არა ბადრაგის თანხლებით, არის რაღაც გზები, ალბათ იურისტებმა უფრო იციან ამის შესახებ", — განაცხადა ნიკოლოზ ყიფშიძემ.

დღეს საკითხს გამოეხმაურა სახალხო დამცველის ინიციატივით შემქნილი სამედიცინო ექსპერტთა ჯგუფის წევრი, კარდიოლოგი გიორგი პაპიაშვილი. ის აცხადებს, რომ ამისთვის სამედიცინო საფუძველი არ არსებობს.