ნაციონალური მოძრაობის ლიდერის, ნიკა მელის განცხადებით, სანამ ყოფილ პრეზიდენტს, მიხეილ სააკაშვილს კლინიკაში არ გადაიყვანენ, მანამდე არ უნდა დაიშალონ. მისი თქმით, სააკაშვილთან ახლა შესულია ეკა ხერხეულიძე და ელოდებიან მისგან პასუხს, დათანხმდება თუ არა ის გორის სამხედრო ჰოსპიტალში გადაყვანას.

"სანამ ფიზიკურად არ იქნება გადაყვანილი, ჩვენ ამ ხელისუფლებას და ამ რეჟიმს არ ვენდობით... სანამ ფიზიკურად არ იქნება გადაყვანილი საავადმყოფოში, ჩვენ არ უნდა დავიშალოთ. უნდა დავრწმუნდეთ, რომ მიხეილ სააკაშვილის სიცოცხლეს საფრთხე აღარ ემუქრება და ამის შემდეგ, რა თქმა უნდა, სხვა გეგმებზე ვისაუბრებთ", — თქვა მელიამ.

მელიას თქმით, სჯერა, რომ სააკაშვილის გადაწყვეტილება იქნება სწორი, რადგან მან კარგად იცის, რომ მისი სიცოცხლე დაკავშირებულია სახელწმიფოსთან.

იუსტიციის მინისტრმა, რატი ბრეგაძემ სპეციალური ბრიფინგი გამართა და ექსპრეზიდენტს გორის ჰოსპიტალში გადაყვანა შესთავაზა. მისი მტკიცებით, გორის ჰოსპიტალი არის ადგილი, სადაც მიხეილ სააკაშვილის ჯანმრთელობა და უსაფრთხოება მაქსიმალურად იქნება დაცული. ჟურნალისტების კითხვას, როდის და როგორ გადაიყვანენ სააკაშვილს, ბრეგაძე პასუხობს, რომ ეს პროცედურა დაიგეგმება ექიმებთან და უსაფრთხოების თანამშრომლებთან ერთად, როდესაც მის მიერ იქნება მიღებული გადაწყვეტილება, რომ იგი თანახმაა, გადავიდეს გორის სამხედრო ჰოსპიტალში და შეწყვიტოს შიმშილობა.

აღსანიშნავია, რომ მიხეილ სააკაშვილი გორის ჰოსპიტალს საფრთხედ მიიჩნევს. ამაზე ის 11 ნოემბერს გამოქვეყნებულ წერილში წერდა. საფრთხის მიზეზად ის რამდენიმე კილომეტრში საოკუპაციო ხაზისა და სპეცდანიშნულების დანაყოფები ყოფნას ასახელებს.

1-ელ ნოემბერს, მიხეილ სააკაშვილის ადვოკატმა, ნიკა გვარამიამ განაცხადა, რომ სააკაშვილის გორის ჰოსპიტალში გადაყვანა, შემდეგ კი "ოსური სპეცრაზმის" მიერ მისი გატაცება იგეგმებოდა.

რაც შეეხება ჰოსპიტალთან აქციების არგამართვის მოთხოვნას, ამის პირობა ოპოზიციამ ჯერ კიდევ რამდენიმე დღის წინ დადო და თქვა, რომ თუ სააკაშვილს სამოქალაქო კლინიკაში გადაიყვანენ, იქ აქციები არ გაიმართება.

გაიგე მეტი: