დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, დღეისთვის კორონავირუსის საწინააღმდეგო ვაქცინის ერთი დოზით აცრილია 850-მდე ბავშვი, ხოლო ორჯერადად — 60-მდე.

"დღეისთვის, დაახლოებით, 850-მდე ბავშვია უკვე აცრილი ერთჯერადათ და, დაახლოებით, 60-მდე ბავშვი უკვე სრულად, ორჯერადად Pfizer-ის ვაქცინით. ამ ასაკში ადმინისტრირდება მხოლოდ და მხოლოდ Pfizer-ის ვაქცინა. ასევე, დაახლოებით, 10-დან 11 000 მოზარდამდე აცრილია 16-17 წლის ასაკის მოზარდები", — აცხადებს ის.

9 ნოემბერს იმუნიზაციის საბჭომ მხარი დაუჭირა 12-დან 15 წლამდე ბავშვების ვაქცინაციის პროცესს. ჯანდაცვის მინისტრის მოადგილის, თამარ გაბუნიას თქმით, ბავშვების აცრა მოხდება Pfizer-ის ვაქცინით, მშობლის გადაწყვეტილებითა და თანხმობით.

საქართველოში ამ დროისთვის 3 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

უკვე შესაძლებელია ბუსტერითა და ჩანაცვლებით სარგებლობაც. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.